အမေ့ သရက်သီးထောင်း

အမေ အလွမ်းပြေလေးပေ့ါ ။ သရက်သီးပေါ်ချိန် ဆိုတော့ ဒီနေ့ အိမ်မှာ နေရင်း ထောင်းစားလိုက်တယ် ။ ရာသီစာတွေကို အမြဲ ချက်ပေးတဲ့ အမေကိုလည်း သတိရမိတယ် ။ အမေ့လက်ရာတော့ မမှီပါဘူး ။ အခုထောင်းတဲ့ နည်းက အဖေ့ အကြိုက် ၊ အမေနဲ့ သမီးများကတော့ ပုဖွန်ခြောက် နဲ့ ကြက်သွန်ဖြူ မပါဘဲ ချဉ်ချဉ်စပ်စပ် သရက်သီးထောင်းကို ပိုကြိုက်ပါတယ် ။ သရက်သီးထောင်းကို ငါးနီတူ မီးကင်လေးနဲ့ ငါးနီတူခေါင်းချိုးပြီးပြုတ်ထားတဲ့ ဟင်းရည်ထဲမှာ ယာအပြန် လမ်းကချိုးလာတဲ့ အရွက်လေးတွေကို ခပ်ပြီး ထမင်းပူပူလေးနဲ့ ကျွေးခဲ့တဲ့ အမေ့ရဲ့ စေတနာ ၊ လက်ရာလေးတွေကို ဘယ်တော့မှလည်း မမေ့ပါဘူး ။ အလုပ်ပင်ပန်းပြီး ပြန်လာတဲ့ အဖေနဲ့ သားသမီးတွေကို ရှိတာလေးနဲ့ ကောင်းအောင် လုပ်ကျွေးတတ်တဲ့ အမေ့ရဲ့ ထမင်းဝိုင်းလေးကို ဘယ်အစာအစားများနှင့်မှ ယှဉ်ရျ် မရပါ ။ ကဲ… သရက်သီးတွေလည်းပေါ်ချိန် ဆိုတော့ ထောင်းစားကြည့်လိုက်ပါအုံးနော်။

ပါဝင်ပစ္စည်း

သရက်သီး အလုံးကြီး – ၁ လုံး

ငရုတ်သီးစိမ်း – ၃၀ တောင့်ခန့်

ကြက်သွန်ဖြူ အမွှာကြီး – ၉ မွှာ

ငပိကင် – ၅ ကျပ်သား ခန့်

ပုဇွန်ခြောက်မှုန့် – ၂ ဇွန်း (လဖက်ရည်ဇွန်း)

ငရုတ်ကောင်းစေ့ – အနည်းငယ်

ပြုလုပ်နည်း

သရက်သီးကို အခွံခွာပြီး ရေဆေးပြီး ဓါးနဲ့ ပေါက်ပါ။

ဒယ်အိုး ထဲတွင် ငရုတ်သီးစိမ်း၊ ကြက်သွန်ဖြူ၊ ငရုတ်ကောင်းစေ့ တို့ကို လှော်ပါ။

ငပိကို မိုက်ခရိုဝေ့ထဲတွင် မိနစ်ဝက်ခန့်ထည့်၍ ကင်ပါ။

ပြီးလျင် ပါဝင်ပစ္စည်း အားလုံးကို ရော၍ ထောင်းပါ။