အရေးကြီးတဲ့ အစည်းအဝေး၊ အင်တာဗျူးစတဲ့ အထူးတလည်နေ့ရက်တွေမှာ ဝမ်းချုပ်ပြီး မအီမသာဖြစ်နေတယ်လို့ တွေးကြည့်လိုက်ပါ။ တကယ့်ကို အိမ်မက်ဆိုးကြီးတစ်ခုလိုပါပဲ။ သက်သောင့်သက်သာမဖြစ်တဲ့အပြင် တစ်ခုခုကို စားသောက်မိမယ်ဆိုရင်လည်း ဝမ်းဗိုက်ထဲမှာ ရစ်နေပါလိမ့်မယ်။

တကယ်လို့ ဝမ်းချုပ်ဝေဒနာခံစားရပြီး မြန်မြန်သက်သာချင်တယ်ဆိုရင်တော့ အခုဖော်ပြပေးမယ့် ဖျော်ရည်လေးတွေကို မိမိဘာသာ အိမ်မှာ ဖျော်သောက်ကြည့်လိုက်ပါ။

သံပုရိုရည်

သံပုရိုရည် တစ်ခြမ်း၊ ရေနွေးနွေးတစ်ခွက်၊ ပျားရည် လက်ဖက်ရည်ဇွန်း ၁ ဇွန်းနဲ့ သစ်ကြမ်းပိုးခေါက်မှုန့် လက်ဖက်ရည်ဇွန်း တစ်ဝက်တို့ လိုအပ်ပါမယ်။ ရေနွေးထဲကို သံပုရိုရည် ညှစ်ထည့်ပြီး ပျားရည်၊ သစ်ကြမ်းပိုးခေါက်မှုန့်တို့ကို သမအောင် ရောမွှေပေးလိုက်ပါ။ သေချာမွှေပြီးသွားတဲ့အခါမှာတော့ စိတ်ချလက်ချသောက်သုံးလို့ရပါပြီ။

သံပုရိုရည်က အမျှင်ဓာတ်နဲ့ ဗီတာမင်စီဓာတ် ကြွယ်ဝတဲ့အတွက်ကြောင့် ဝမ်းချုပ်ခြင်းကို သက်သာစေပြီး ကိုယ်ခံအားကောင်းမွန်စေပါတယ်။ သစ်ကြမ်းပိုးခေါက်မှုန့်ကတော့ အစာချေစနစ်ကို ကောင်းမွန်စေပြီး ပျားရည်ကတော့ ခန္ဓာကိုယ်ထဲက အဆိပ်အတောက်တွေကို ဖယ်ရှားပေးပါတယ်။

လိမ္မော်ရည်

ဒီဖျော်ရည် ဖျော်ဖို့အတွက် လိမ္မော်သီး ၃ လုံး၊ ၄ လုံးခန့်ရယ် ဆားအမဲ အနည်းငယ်ရယ် လိုအပ်ပါတယ်။ လိမ္မော်သီးကို အရည်ညှစ်ပြီးနောက် ဆားထည့်ပြီး သမအောင် မွှေပေးလိုက်ပါ။ မွှေပေးပြီးတဲ့နောက်မှာ အရသာရှိရှိသုံးဆောင်နိုင်ပါပြီ။

လိမ္မော်သီးမှာ ဗီတာမင် စီ၊ သတ္တုဓာတ်နဲ့ အမျှင်ဓာတ်တို့ပါဝင်ပြီး ရေဓာတ်များလည်း အများအပြားပါဝင်တာကြောင့် အစာချေစနစ်ကို ကောင်းမွန်စေပြီး ဝမ်းချုပ်ခြင်းကို ချက်ချင်းသက်သာစေမှာပဲဖြစ်ပါတယ်။

ဝမ်းချုပ်နေစဉ်မှာ စားသုံးသင့်တဲ့ အခြားအစားအစာများ

အသီးထဲမှာဆိုရင်တော့ ဇီးသီး၊ သစ်တော်သီး၊ ဖရဲသီး၊ လိမ္မော်သီး၊ သံပုရာသီး၊ သံပုရိုသီးနဲ့ ပန်းသီးတို့ကို စားသုံးသင့်ပါတယ်။ ဟင်းသီးဟင်းရွက်ထဲမှာတော့ ကိုက်လန်၊ ဟင်းနုနွယ်၊ ပန်းဂေါ်ဖီစိမ်း၊ မုန်လာဥနီ၊ မုန်လာဥဖြူ၊ နီညိုရောင်ရှိသော သကြားမုန်လာဥနဲ့ တရုတ်နံနံ တို့ပဲဖြစ်ပါတယ်။ အစေ့အဆံထဲမှာဆိုရင်တော့ ဖရုံစေ့၊ အယ်လ်မွန်စေ့၊ ဇီရာစေ့၊ စမုန်စပါးစေ့တို့ပဲဖြစ်ပါတယ်။ အဆီထဲမှာဆိုရင်တော့ သံလွင်ဆီကို မှီဝဲသင့်ပြီး ရေများများ သောက်သုံးဖို့လည်း လိုပါတယ်။ လတ်ဆတ်တဲ့သစ်သီးဖျော်ရည်နဲ့ ခန္ဓာကိုယ်ထဲက အဆိပ်အတောက်တွေကို ဖယ်ရှားပေးမယ့် Detox ဖျော်ရည်လေးတွေလည်း သောက်သုံးပေးနိုင်ပါတယ်။

Source: Stylecraze.com