ဒိန်ချဉ်ကို ကိုယ်အလေးချိန် လျှော့ချရာမှာ ထိထိရောက်ရောက်အသုံးပြုနိုင်သလို ကျန်းမာရေးအတွက် စားသင့်တဲ့ အစားအစာထဲမှာလည်း ဒိန်ချဉ်ပါဝင်နေပါတယ်။ ဒိန်ချဉ်မှာ ပရိုတင်းဓါတ်၊ ကယ်လ်ဆီယမ်၊ ဗီတာမင် D ၊ B2၊ B12၊ B5 စတဲ့ဓါတ်တွေ ကြွယ်ဝစွာပါဝင်ပါတယ်။
ဒါ့အပြင် ဒိန်ချဉ်ဟာ ခြောက်သွေ့တဲ့ အသားအရေအတွက် အကောင်းဆုံး အဖော်မွန်လည်းဖြစ်ပါတယ်။ နွားနို့ကို အချဉ်ဖောက်ထားတဲ့ ဒိန်ချဉ်က အသားအရေ ခြောက်သွေ့မှုကို ဖယ်ရှားပေးနိုင်ပြီး ဝင်းလက် စိုပြေလာစေမှာ ဖြစ်ပါတယ်။
ဒါ့အပြင် ဒိန်ချဉ်မှာပါတဲ့ အက်ဆစ်ဓါတ်တစ်မျိုးက အရေပြားယားယံတာတွေကို ဖြစ်စေတဲ့ ပိုးမွှားတွေကို တိုက်ဖျက်ပေးနိုင်ပါတယ်။
ဘယ်လိုအသုံးပြုမလဲ
နေ့စဉ်အသုံးပြုလိုသူတွေအတွက်
နေ့စဉ်အသုံးပြုလိုသူတွေအတွက်ကတော့ ဒိန်ချဉ်ကို လက်၊ မျက်နှာ နဲ့ ခြေထောက်တွေကို လိမ်းပေးပါ။ အဲဒီနောက် ၁၀ မိနစ်လောက်ထားပြီး ရေချိုးပါ။
အပတ်စဉ်အသုံးပြုလိုသူတွေအတွက်
အပတ်စဉ်အသုံးပြုလိုသူတွေအတွက်ကတော့ ဒိန်ချဉ် ဖန်ခွက်ရဲ့ ၁/၂ နဲ့ အမှည့်လွန်ပြီး ပျော့နေသော သင်္ဘောသီး စားပွဲတင်ဇွန်း ၃ ဇွန်းကနေ ၄ ဇွန်းထိထည့်ပါ။ ပျားရည်နဲ့ သံပုယိုရည်အနည်းငယ် ထည့်နိုင်ပါတယ်။ အဲဒီနောက် အရေပြားပေါ်လိမ်းပေးပြီး ၁၀ မိနစ်လောက်ထားကာ ရေအေးနဲ့ ဆေးချပါ။
မျက်နှာပေါင်းတင်ချင်သူတွေအတွက်
မျက်နှာပေါင်းတင်ချင်သူတွေအတွက်ကတော့ ဒိန်ချဉ် စားပွဲတင်ဇွန်း ၄ ဇွန်း၊ cocoa ချော့ကလက်လုပ်တဲ့ အသီးမှုန့် စားပွဲတင်ဇွန်း ၁ ဇွန်း နဲ့ ပျားရည်စားပွဲတင်ဇွန်း ၁ ဇွန်းထည့်ပြီး မွှေပေးပါ။ အဲဒါကို မျက်နှာနဲ့ လည်ပင်းပေါ် လိမ်းပေးပြီး မိနစ် ၃၀ လောက်ထားပါ။ ရေအေးနဲ့ မျက်နှာသစ်ပြီး ပုဝါနဲ့ ခပ်ဖွဖွလေးသုတ်ပေးပါ။ တစ်ပတ်ကို ၂ ကြိမ် (သို့) ၃ ကြိမ်လုပ်နိုင်ပါတယ်။
