ထောပတ်သီး စားသုံးခြင်းကြောင့် ခံစားရရှိမယ့် အကျိုးကျေးဇူးများ

ထောပတ်သီးလေးတွေက ခရင်မ်အရသာလေးလို ဆိမ့်ဆိမ့်လေးနဲ့စားလို့ကောင်းပြီး အပူပိုင်းဒေသတွေမှာ အများဆုံးစိုက်ပျိုးတဲ့ သစ်သီးတစ်မျိုးဖြစ်ပါတယ်။ ထောပတ်သီးကို နေ့စဉ် စားသုံးပေးပါက အဝလွန်ခြင်းမှ ကင်းဝေးပြီး ဆီးချို သွေးချိုနဲ့ နှလုံးရောဂါများ မခံစားရအောင် စွမ်းဆောင်ပေးနိုငပါတယ်။ ဒါ့အပြင် အသားအရေလှပအောင် ကူညီပေးပြီး၊ ဆံကေသာ ကျန်းမာသန်စွမ်းစေဖို့၊ စွမ်းအင် ပြည့်ဝစေဖို့အတွက်လည်း ကူညီပေးပါတယ်။

ကျန်းမာရေးအတွက် ဘယ်လိုအကျိုးကျေးဇူးတွေ ပေးစွမ်းနိုင်သေးလဲဆိုတော့…

အမြင်အာရုံကောင်းမွန်ခြင်း

ထောပတ်သီးထဲမှာ ပါဝင်တဲ့ Lutein နဲ့ Zeaxanthin ဓာတ်တို့က ခရမ်းလွန်ရောင်ခြည်ဒဏ်နဲ့ အခြားပြင်ပအန္တရာယ်များကြောင့် ပျက်စီးသွားတဲ့ မျက်လုံးတစ်သျှူးတွေကို ပြန်လည်ကောင်းမွန်လာအောင် ထောက်ပံ့ပေးပါတယ်။ ထောပတ်သီး မှန်မှန်စားသုံးပေးမယ်ဆိုရင် အသက်အရွယ် အိုမင်းလာလို့ မျက်လုံးကြွက်သားများ အားနည်းလာပြီး အမြင်အာရုံချို့ယွင်းလာခြင်းမှ ကာကွယ်ဟန့်တားပေးပါတယ်။

အရိုးပွရောဂါ မခံစားရအောင် ကာကွယ်ပေးခြင်း

ထောပတ်သီး တစ်ခြမ်းမှာ နေ့စဉ်မှီဝဲစားသုံးသင့်တဲ့ ဗီတာမင်ကေဓာတ် ၂၅ ရာခိုင်နှုန်းခန့် ပါဝင်ပါတယ်။ အရိုးကျန်းမာ ကြံ့ခိုင်နေဖို့အတွက် ကယ်လစီယမ်နဲ့ ဗီတာမင်ဒီတို့ပဲ လိုအပ်တယ်လို့ ထင်တတ်ကြပါတယ်။ တကယ်တော့ ဗီတာမင်ကေကလည်း ကယ်လစီယမ်ဓာတ်ကို အထောက်အပံ့ပေးရတာကြောင့် အကျိုးကျန်းမာရေးအတွက် ကယ်လစီယမ်က ဇာတ်ဆောင်ဆိုရင် ဗီတာမင်ကေက ဇာတ်ပို့နေရာက တာဝန်ယူထားရတဲ့သူပါ။

အစာခြေစနစ် ကောင်းမွန်စေခြင်း

ထောပတ်သီးတစ်ခြမ်းမှာ အမျှင်ဓာတ် ၆ ဂရမ်၊ ၇ ဂရမ်လောက် ပါဝင်ပြီး ထိုကဲ့သို့ အမျှင်ဓာတ်ကြွယ်ဝတဲ့ သစ်သီးများကို စားသုံးပေးခြင်းက အစာအိမ်အတွက် ကောင်းမွန်ပါတယ်။ ဝမ်းချုပ်နေသူများ အထူးမှီဝဲစားသုံးသင့်တဲ သစ်သီးတစ်မျိုးပါပဲ။ ဒါ့အပြင် အူလမ်းကြောင်းကို ကျန်းမာစေပြီး အူမကြီး ကင်ဆာဖြစ်ပွားနှုန်းကို လျော့ချပေးနိုင်ပါသေးတယ်။

ဦးနှောက် ကျန်းမာရေးနဲ့ မှတ်ဉာဏ်စွမ်းအားကို မြှင့်တင်ပေးခြင်း

ထောပတ်သီးထဲမျာ ပါဝင်တဲ့ Omega-9 Fatty အက်စစ်က မှတ်ဉာဏ်စွမ်းအားနဲ့ ချိတ်ဆက်နေပါတယ်။ ၂၀၀၉ ခုနှစ်မှ အမေရိကန်နိုင်ငံက သုတေသနပညာရှင်တွေရဲ့ လေ့လာချက်အရ ထိုအက်စစ်ဓာတ်က မှတ်ဉာဏ်စွမ်းအားတွေကို မြှင့်တင်ပေးနိုင်တယ်လို့ သိရှိရပါတယ်။

ကိုယ်ဝန်ဆောင် မိခင်များအတွက် မှီဝဲသင့်တဲ့ အစားအစာကောင်းတစ်ခု

ထောပတ်သီးထဲမှာ ပါဝင်တဲ့ အမျှင်ဓာတ်၊ ပိုတက်ဆီယမ်၊ သဘာဝအဆီဓာတ်နဲ့ Folate တို့ကဆိုရင် မိခင်ကျန်းမာရေးအတွက်ရော ကလေးကျန်းမာရေးအတွက်ပါ ထောက်ပံ့ပေးနိုင်ပါတယ်။ ကိုယ်ဝန်ဆောင်မိခင်အနေနဲ့ ထောပတ်သီးစားသုံးပေးမယ်ဆိုရင် မွေးလာတဲ့ကလေးက ကျန်းကျန်းမာမာ ပြည့်ပြည့်ဖြိုးဖြိုးရှိနေမှာဖြစ်ပြီး နို့တိုက်တဲ့အခါမှာလည်း နို့များများထွက်မှာပဲဖြစ်ပါတယ်။