အရက်က ကျန်းမာရေးအတွက် ကောင်းတဲ့အရာ တစ်ခုတော့မဟုတ်ပေမယ့် သင့်တင့်မျှတတဲ့ ပမာဏလောက် သောက်ရင်တော့ ကျန်းမာရေးကို အရမ်းမထိခိုက်နိုင်ပါဘူး။
ဒါပေမယ့် အရက်တွေအများကြီး နှစ်ပေါင်းများစွာသောက်လာရင်တော့ ဦးနှောက်၊ သွေးအတွင်း အချိုဓာတ်၊ အသည်း ၊ သွားနဲ့ တခြား ကျန်းမာရေး ဆိုးကျိုးတွေအများကြီးရှိပါတယ်။
အရက်သောက်ခြင်းက သွားနဲ့ ခံတွင်းတစ်ရှူးတွေကို ဘယ်လိုထိခိုက်နိုင်သလဲ
အမေရိကန်ပြည်ထောင်စု ရောဂါထိန်းချုပ်ရေးနဲ့ကာကွယ်ရေး ဌာန (CDC) က အရက်တွေကို သင့်တင့်မျှတရုံသောက်တဲ့ပမာဏဆိုတာ အမျိုးသမီးတွေဆိုရင် တစ်နေ့ တစ်ခွက်၊ အမျိုးသားတွေဆို တစ်နေ့ ၂ခွက်ထက် ပိုမသောက်သုံးတာကို ဆိုလိုကြောင်း ထုတ်ပြန်ထားပါတယ်။
အမျိုးသမီးတွေအနေနဲ့ တစ်ပတ်မှာ အရက် ၈ ခွက်ကျော်လွန်၊ အမျိုးသားတွေဆိုရင် တစ်ပတ်မှာ အရက် ၁၅ ခွက်ထက် ကျော်လွန်အောင် သောက်ရင်တော့ အလွန်အကျွံသောက်သုံးတဲ့ အဆင့်ကို ရောက်ရှိတယ်လို့CDC က ထုတ်ပြန်ထားပါတယ်။
အဲ့လို အလွန်အကျွံသောက်သုံးသူတွေဟာ သွားနဲ့ ခံတွင်းရောဂါတွေဖြစ်တဲ့ သွားပျက်စီးတာ၊ ခံတွင်းမှာ အပူဖုတွေဖောက်တာတွေနဲ့ ခံတွင်းကင်ဆာဖြစ်ပွားနိုင်ချေများပါတယ်။
သွားတွေ စွန်းထင်းတာ
အရက်ရဲ့ အရောင်က Chromogens ကွန်ပေါင်းတွေပါဝင်တာကြောင့် သွားကြွေလွှာတွေမှာ စွန်းထင်းကုန်ပါတယ်။
အဖြူရောင်ဖြစ်တဲ့ သွားတွေက တဖြည်းဖြည်း ဝါကျင့်ကျင့် ပုံစံမျိုးတွေ စွန်းထင်းလာပါတယ်။
အရက်အပြင် ဝိုင်အနီရောင်သောက်သုံးသူတွေလည်း သွားတွေစွန်းထင်းနိုင်ပါတယ်။ အမည်းရောင်ဘီယာ သောက်သုံးသူတွေကလည်း သွားကြွေလွှာတွေ တဖြည်းဖြည်း မည်းလာပါလိမ့်မယ်။
ခံတွင်းခြောက်သွေ့ခြင်း
တံတွေးတွေက ခံတွင်းနဲ့သွားတွေကို စိုစွတ်အောင် ပြုလုပ်ပေးတာပါ။ အဲ့ဒီအပြင် တံတွေးက သွားချေးလွှာတွေနဲ့ ဘက်တီးရီးယားတွေကို ကူညီဖယ်ရှားပေးပါတယ်။ အရက်သောက်တာများရင်တော့ တံတွေးထွက်ရှိမှုကို ထိခိုက်နိုင်ပြီး ခံတွင်းခြောက်သွေ့စေပါတယ်။
