ဟိုနား ဒီနား လမ်းလျှောက်လိုက်ရုံ၊ ခဏလေး ပြေးလိုက်ရုံနဲ့ မောနေပြီလား။ ဒီလိုအလွယ်တကူမောလာပြီဆိုရင် လူတော်တော်များများက အသက်အရွယ်ကိုသာ အပြစ်တင်ကြပါတယ်။ အသက်အရွယ်ရလာလို့ ငယ်ငယ်တုန်းကလို အမောမခံနိုင်တော့တာဆိုပြီး တွေးတတ်ကြပါတယ်။
ကျန်းမာကြံ့ခိုင်တဲ့ ခန္ဓာကိုယ်ကို ပိုင်ဆိုင်ချင်တယ်ဆိုရင် လုံလောက်တဲ့ စွမ်းအင်များ ပိုင်ဆိုင်ထားသင့်ပါတယ်။ ထိုစွမ်းအင်များကို အာဟာရပြည့်ဝပြီး သက်လုံကောင်းစေတဲ့ အစားအစာများမှ ရရှိနိုင်ပါတယ်။ ဒါဆိုရင် အမောခံနိုင်ဖို့အတွက် ဘယ်လိုအစားအစာတွေ စားသင့်သလဲဆိုတာကို ဆက်လေ့လာကြည့်လိုက်ရအောင်။
ကာဘိုဟိုက်ဒြိုက်ဓာတ် ကြွယ်ဝသော အစားအစာများ
Source: benchfit.com.au
ကာဘိုဟိုက်ဒြိုက်ဓာတ်များက အမျှင်ဓာတ်ကြွယ်ဝပြီး အစာချေရာမှာ နှေးကွေးပါတယ်။ ထိုအစားအစာများက ဦးနှောက်နဲ့ ကြွက်သားများအတွက် လောင်စာများ ဖြည့်တင်းပေးနိုင်ပြီး တစ်နေ့တာလုံးစွမ်းအင်ပြည့်ဝဖို့ ကူညီပေးမှာပါ။ ကာဘိုဟိုက်ဒြိုက်ဓာတ် ကြွယ်ဝသော အစားအစာများကို သစ်သီးများ၊ ပဲအမျိုးမျိုး၊ အစေ့အဆံများ၊ အုတ်ဂျုံ၊ ဆန်လုံးညို၊ ပေါင်မုန့်၊ ပါစတာ၊ ဟင်းသီးဟင်းရွက် စတဲ့အစားအစာများထံမှ ရရှိနိုင်ပါတယ်။
ပရိုတင်းဓာတ် ကြွယ်ဝသော အစားအစာများ
Source: clifehealth.com.au
အစားအစာများထံမှ ရရှိတဲ့ ပရိုတင်းဓာတ်များက အစာအိမ်ထဲရောက်သွားတဲ့အခါ အမိုင်နိုအက်ဆစ်အဖြစ်ပြိုကွဲသွားပြီး ထိုအက်ဆစ်များက ကြွက်သားများ သန်မာနေစေဖို့၊ ဟော်မုန့်ဓာတ်များ ထုတ်လွှတ်ပေးဖို့၊ သွေးနီဥဆဲလ်များနှင့် တစ်သျှူးဆဲလ်များ အသစ်ပြန်လည်တည်ဆောက်နိုင်ဖို့အတွက် ကူညီပေးပါတယ်။ ပရိုတင်းဓာတ်ကြွယ်ဝသော အစားအစာများကို ငါးအမျိုးမျိုး၊ ဥအမျိုးမျိုး၊ ကြက်သား၊ နွားနို့၊ ဒိန်ခဲ၊ ပဲအမျိုးမျိုး စတဲ့ အစားအစာများထဲမှ ရရှိပါတယ်။
ကျန်းမာရေးနဲ့ ညီညွှတ်သော သဘာဝအဆီဓာတ်
Source: health.harvard.edu
အဆီတိုင်းက ကျန်းမာရေးကို ထိခိုက်စေတာမဟုတ်ပါဘူး။ ခန္ဓာကိုယ်အတွက် မရှိမဖြစ်လိုအပ်တဲ့ သဘာဝအဆီဓာတ်များကိုလည်း မှီဝဲစားသုံးသင့်ပါတယ်။ ကျန်းမာရေးနဲ့ ညီညွှတ်တဲ့ သဘာဝအဆီဓာတ်တွေကိုတော့ အိုမီဂါသရီး ဖက်တိအက်ဆစ်ဓာတ် ကြွယ်ဝတဲ့ ငါးများ၊ အယ်လ်မွန်သီး၊ သစ်ကြားသီးနဲ့ ဟင်းသီးဟင်းရွက်ဆီတို့မှ ရရှိနိုင်ပါတယ်။
သံဓာတ်နှင့် ကယ်လ်စီယမ်ဓာတ်
Source: vaya.in
သံဓာတ်ချို့တဲ့ခြင်းက သင့်ကို အလွယ်တကူပင်ပန်းနွမ်းနယ်စေပါတယ်။ ဒါ့ကြောင့် သံဓာတ်ကြွယ်ဝတဲ့ ဟင်းနုနွယ်၊ ပန်းဂေါ်ဖီစိမ်း၊ အသား၊ ပဲအမျိုးမျိုးတို့အပြင် ကယ်လ်စီယမ်ဓာတ်ကြွယ်ဝတဲ့ နွားနို့၊ ချိစ်၊ ဒိန်ချဉ်၊ အစိမ်းရောင်ဟင်းသီးဟင်းရွက်များ၊ ငါးသေတ္တာငါး စတဲ့ အစားအစာများ ထံမှ ရရှိနိုင်ပါတယ်။
ဗီတာမင် စီဓာတ်
Source: allaboutvision.com
ဗီတာမင်စီကတော့ သင့်ခန္ဓာကိုယ်ကို ကိုယ်ခံစွမ်းအားမြင့်မားနေအောင် ကူညီပေးပြီး မကြာခဏ နာမကျန်းဖြစ်ခြင်းမှ ကင်းဝေးစေပါတယ်။ ဗီတာမင်စီဓာတ် ကြွယ်ဝတဲ့အစားအစာတွေကတော့ သံပုယိုသီး၊ သံပုရာသီး၊ ပန်းသီး၊ လိမ္မော်သီး၊ ကီဝီသီး၊ မာလကာသီး၊ Grapefruit သီး၊ စပျစ်သီး၊ ဟင်းနုနွယ်၊ ကိုက်လန်၊ ငရုတ်ပွ၊ ခရမ်းချဉ်သီး၊ ပန်းဂေါ်ဖီစိမ်း၊ ပန်းဂေါ်ဖီ၊ ပဲပင်ပေါက်၊ နံနံပင် စတဲ့ အစားအစာမထားထဲမှ ရရှိနိုင်ပါတယ်။
