အသက်အရွယ်တဖြည်းဖြည်းရလာတာနဲ့အမျှ ခန္ဓာကိုယ်အင်္ဂါအစိတ်အပိုင်းတွေက ငယ်ရွယ်စဉ်တုန်းကလို ကျန်းမာနေမှာမဟုတ်တော့ပါဘူး။ တဖြည်းဖြည်းနဲ့ ယိုယွင်းပျက်စီးလာနေပါပြီ။ အသက်ရှင်ရပ်တည်ဖို့အတွက် အရေးကြီးဆုံး အင်္ဂါအစိတ်အပိုင်းတစ်ခုဖြစ်တဲ့ နှလုံးကလည်း ထိုနည်းတူပါပဲ။ အသက် (၄၀) ကျော်လာပြီဆိုတာနဲ့ နှလုံးကျန်းမာရေးကို အရင်ကထက် ပိုဂရုစိုက်သင့်ပါတယ်။

ဒါ့ကြောင့် အသက် (၄၀) အရွယ်မှာ ဘယ်လိုအစားအစာတွေကို စားသုံးသင့်လဲဆိုတာ ဖော်ပြပေးလိုက်ရပါတယ်။

ခရမ်းချဉ်သီး

ခရမ်းချဉ်သီးထဲမှာ တွေ့ရတဲ့ Lycopene လို့ခေါ်သော Antioxidant က သွေးလွှတ်ကြောနံရံကို သန့်စင်ပေးပြီး သွေးကြောပိတ်ဆို့ခြင်းမှ ကာကွယ်ပေး ပါတယ်။ ဒါ့ကြောင့် ဒီနီနီရဲရဲအသီးကို နေ့စဉ်မှန်မှန်မှီဝဲပေးလိုက်ပါ။ ဒါပေမဲ့ ခရမ်းချဉ်သီးဆော့စ်ကတော့ သကြားပါဝင်မှုများတဲ့အတွက် ကြောင့် နှလုံးကျန်းမာရေးအတွက် ကောင်းကျိုးထက် ဆိုးကျိုးဖြစ်စေပါတယ်။

နနွင်းမှုန့်

နနွင်းမှုန့်က ရောင်ရမ်းမှုကို လျော့ချပေးတဲ့ ဟင်းခတ်မှုန့်တစ်ခုပါပဲ။ နှလုံးကျန်းမာရေးက အယ်လ်ဇိုင်းမားရောဂါ၊ စိတ်ကျရောဂါတို့နဲ့ ဆက်စပ်နေတာကြောင့် နှလုံးရောင်ရမ်းမှုကို လျော့ချဖို့အတွက်ဆိုရင် နနွင်းမှုန့်က အကောင်းဆုံးဆေးစွမ်းကောင်းတစ်လက်ပါပဲ။

ဖရဲသီး

Lycopene နဲ့ ပိုတက်ဆီယမ်တို့ ကြွယ်ဝစွာပါဝင်တဲ့ ဖရဲသီးက သွေးပေါင်တက်ခြင်းကို လျော့ချပေးပြီး ဗီတာမင် စီလည်း ကြွယ်ဝစွာပါဝင်တဲ့အတွက်ကြောင့် သင့်ကျန်းမာရေးအတွက် အထူးစားသုံးသင့်တဲ့ အစားအစာပဲဖြစ်ပါတယ်။

ဝက်မိုးခိုသား

နှလုံးကျန်းမာရေးအတွက်ဆိုရင် ဝက်သားရဲ့ အခြားအစိတ်အပိုင်းတွေထက် ဝက်မိုးခိုသားက အကောင်းဆုံးပါပဲ။ ဝက်မိုးခိုသားထဲမှာ ပိုတက်ဆီယမ်ဓာတ်အပြင် မဂ္ဂနီဆီယမ်ဓာတ်ကိုပါ ထပ်မံတွေ့ရှိရတာကြောင့် သွေးပေါင်ချိန်ကို လျော့ချရာမှာ အထောက်အပံ့ပေးပါတယ်။ ဒါပေမဲ့ သွေးတိုးသမားတွေကတော့ စားသုံးသင့် မစားသုံးသင့်ကို ဆရာဝန်ထံမှ ခွင့်ပြုချက်ရယူသင့်ပါတယ်။

ဟင်းနုနွယ်

အစိမ်းရောင်ဟင်းသီးဟင်းရွက်တွေက ကျန်းမာရေးအတွက် ကောင်းမွန်ပါတယ်။ ထိုထဲကမှ ဟင်းနုနွယ်ကတော့ နံပါတ် (၁) ဗိုလ်စွဲထားတဲ့ ဟင်းရွက်ပဲဖြစ်ပါတယ်။ ပိုတက်ဆီယမ်နဲ့ မဂ္ဂနီဆီယမ်ဓာတ်တို့ ကြွယ်ဝစွာ ပါဝင်တဲ့အပြင် သွေးလွှတ်ကြော ပိတ်ဆို့မှုမှကာကွယ်ပေးပြီး သွေးလွှတ်ကြောနံရံကို သန့်စင်ပေးတဲ့ Lutein လို့ခေါ်သော Antioxidant တစ်မျိုးလည်း ပါဝင်တယ်လို့ ကျွမ်းကျယ်ပညာရှင်များက ပြောကြားထားပါတယ်။

ဘယ်ရီသီးများ

ဘလက်ဘယ်ရီ၊ ဘလူးဘယ်ရီ၊ ရက်စ်ဘယ်ရီ၊ စတော်ဘယ်ရီ စတဲ့ သစ်သီးများက Antioxidant များ ကြွယ်ဝစွာပါဝင်တဲ့အတွက်ကြောင့် သွေးတွင်းသကြားဓာတ် မမြင့်မားစေဘဲ ချိုမြိန်တဲ့အရသာကို ပေးစွမ်းတဲ့ သစ်သီးတွေပဲဖြစ်ပါတယ်။

ချောကလက်မဲ၊ ထောပတ်သီး၊ ပန်းသီး၊ ကိုက်လံ၊ ငှက်ပျောသီး၊ မြေပဲပြုတ်၊ ကန်စွန်းဥ၊ ဂျင်း၊ ပန်းဂေါ်ဖီစိမ်း၊ သံပုရာသီး၊ သံပုရိုသီး၊ ရှောက်သီး၊ သံလွင်ဆီ၊ လက်ဖက်စိမ်း၊ ကြက်သွန်ဖြူ၊ ကြက်ဥအကာ စတဲ့ အစားအစာတွေကလည်း နှလုံးကျန်းမာရေးအတွက် အထူးကောင်းမွန်တာကြောင့် မမေ့မလျော့ စားသုံးသင့်ပါတယ်။