သင့် ခန္ဓာကိုယ်တွင်းရှိ ဒုတိယအကြီးဆုံး ကိုယ်တွင်း အင်္ဂါပစ္စည်းကတော့ အသည်းဖြစ်ပြီး အသက်ရှင်နေထိုင်ဖို့ရန်အတွက် အရေးအကြီးဆုံး ဂလင်းတစ်ခုဖြစ်ပါတယ်။ ၁.၄ ကီလိုဂရမ်လေးတဲ့ အသည်းက ၂၄ နာရီလုံး မရပ်မနား အလုပ်လုပ်နေရတာပါ။

သင့်ရဲ့ နေထိုင် စားသောက်မှုပုံစံပေါ် မူတည်ပြီး အသည်းရဲ့ ကျန်းမာရေးကလည်း ပြောင်းလဲသွားပါလိမ့်မယ်။ အရက် အလွန်အကျွံသောက်သုံးတဲ့အခါ ကျန်းမာရေးနဲ့ မညီညွှတ်တဲ့အစားအစာတွေ စားသုံးတဲ့အခါ အသည်းက လိုသည်ထက်ပိုပြီး အလုပ်လုပ်ရပါတယ်။ အချိန်ကြာလာတဲ့အခါ အသည်းရဲ့ စွမ်းဆောင်ရည်က ကျဆင်းသွားပြီး အသည်းပျက်စီးသွားပါတော့တယ်။

ဒီလိုအသည်းပျက်စီးတဲ့အခြေအနေမှ ကာကွယ်ဖို့အတွက် ဘယ်လိုအစားအစာတွေ စားသုံးသင့်လဲဆိုတာကို ဖော်ပြပေးချင်ပါတယ်။

ကြက်သွန်ဖြူ

မနက်မိုးလင်းတာနဲ့ ကြက်သွန်ဖြူ ၁ မြွှာကို နေ့တိုင်း စားသုံးပေးရပါမယ်။ ဒါ့အပြင် ပါးပါးလှီးထားသော ကြက်သွန်ဖြူ လက်ဖက်ရည်ဇွန်း ၂ ဇွန်းခန့်ကိုလည်း အစားအစာ ချက်ပြုတ်တိုင်း ထည့်ချက်ပေးမယ်ဆိုရင်တော့ အသည်းကျန်းမာရေးအတွက် အင်မတန်အထောက်အကူဖြစ်စေပါတယ်။

ဂျင်ဆင်း

ဂျင်ဆင်းက ကျန်းမာရေးအတွက် ဘက်စုံအသုံးဝင်တဲ့ သစ်သီးသစ်ဖုလေးပဲ ဖြစ်ပါတယ်။ အသည်းကျန်းမာဖို့အတွက်ဆိုရင် ဂျင်ဆင်းဖျော်ရည်ကို တစ်နေ့ ၂ ခွက် သောက်သုံးပေးရပါမယ်။

မုန်လာဥနီ

အမျှင်ဓာတ်၊ ဗီတာမင်ဓာတ်၊ သတ္တုဓာတ်နဲ့ Antioxidants တို့ ကြွယ်ဝစွာ ပါဝင်တဲ့ မုန်လာဥနီက အသည်းအဆီဖုံးခြင်းနဲ့ အသည်း အဆိပ်အတောက်ဖြစ်ခြင်းတို့မှ ကာကွယ်ပေးနိုင်တယ်လို့ အိန္ဒိယနိုင်ငံမှ သုတေသနပညာရှင်တွေရဲ့ လေ့လာချက်တွေအရ သိရှိရပါတယ်။ မုန်လာဥနီဖျော်ရည်ကို နှစ်ရက်ခြား တစ်ခွက် သောက်သုံးပေးပါ။ ကြော်ချက်ထားတဲ့ မုန်လာဥနီဟင်းလျာကိုလည်း ၂ ရက်ခြား၊ ၃ ရက်ခြားတစ်ခါ စားသုံးပေးလိုက်ပါ။

လက်ဖက်စိမ်း

လက်ဖက်စိမ်း နေ့တိုင်း သောက်သုံးသူများက အသည်းကင်ဆာ၊ အသည်းရောင်ရောဂါ၊ အသည်းကြွပ်ရောဂါ စတဲ့ အသည်းရောဂါများ ခံစားရနိုင်ချေကို သိသိသာသာလျော့ချပေးနိုင်တယ်လို့ တရုတ်လူမျိုး သုတေသီတွေရဲ့ လေ့လာချက်အရ သိရှိရပါတယ်။ ဒါ့ကြောင့် Green Tea တစ်နေ့ ၂ ခွက်၊ ၃ ခွက် သောက်သုံးကြပါလို့ အကြံပေးပါရစေ။

ထောပတ်သီး

ထောပတ်သီးနဲ့ ပတ်သက်ပြီး ဂျပန်သုတေသီတွေရဲ့ လေ့လာစမ်းသပ်ချက်အရ ထောပတ်သီးထဲမှာ အသည်းပျက်စီးခြင်းကို ကာကွယ်ပေးနိုင်တဲ့ အာဟာရဓာတ်တွေ ပါဝင်တယ်လို့ သိရပါတယ်။ ကျန်းမာရေးနဲ့ မညီညွှတ်တဲ့အစားအစာများ စားသုံးခြင်းကြောင့် ဖြစ်ပေါ်တတ်တဲ့ အသည်းအဆီဖုံးခြင်းကိုလည်း ကာကွယ်ပေးနိုင်ပါတယ်။ ထောပတ်သီးကို တစ်ပတ်မှာ ၂ ကြိမ်၊ ၃ ကြိမ်ခန့် စားသုံးပေးလိုက်ပါ။

Source: stylecraze.com