ကိုရိုနာဗိုင်းရပ်စ် ကူးစက်ခံရခြင်းမှ ကာကွယ်ရန် ဒီအစားအစာတွေနဲ့ ကိုယ်ခံအားကို မြှင့်တင်ကြမယ်

လတ်တလောမှာ လူအများကို ခြိမ်းခြောက်နေတဲ့ရောဂါကတော့ ကိုရိုနာဗိုင်းရပ်စ်ရောဂါပိုးပဲဖြစ်ပါတယ်။ ဒီရောဂါပိုးအတွက် ကာကွယ်ဆေးလည်း မရှိသလို ရောဂါကူးစက်ခံရပါကလည်း ပျောက်ကင်းအောင် ကုသနိုင်မယ့် ဆေးဝါးလည်း မရှိသေးပါဘူး။

ထိုရောဂါပိုး ကူးစက်ခံရသူတစ်ယောက်အနေနဲ့ အဖျားကိုယ်အပူချိန်မြင့်တက်ခြင်း၊ ချောင်းဆိုးလည်ချောင်းနာခြင်း၊ နှာရည်ယိုခြင်း၊ အသက်ရှုခက်ခဲခြင်း၊ ဝမ်းပျက်ခြင်းနဲ့ အဆုတ်တွင်းရောဂါပိုး ပြင်းထန်ပါက ရင်ဘတ်အလွန်အမင်းအောင့်ခြင်းတို့ ခံစားရနိုင်ပါတယ်။

ရောဂါပျောက်ကင်းအောင် ကုသပေးနိုင်တဲ့ ဆေးဝါးမရှိသေးတဲ့အတွက်ကြောင့် ရောဂါကူးစက်မခံရဖို့အတွက် ကြိုတင်ကာကွယ်တဲ့ နည်းလမ်းတစ်ခုတည်းကသာ အကောင်းဆုံးနည်းလမ်းပါပဲ။

တစ်ကိုယ်ရည် သန့်ရှင်းရေး၊ လက်သန့်ရှင်းရေးတို့ကို ယခင်ကထက်ပိုဂရုစိုက်ခြင်း၊ အသားငါးများ၊ ပင်လယ်စာများကို မကျက်တကျက်စားသုံးခြင်းမှ ရှောင်ကြဉ်ခြင်း၊ လူထူထပ်သောနေရာများ သွားခြင်းမှ ရှောင်ကြဉ်ခြင်း၊ ကိုယ်ခံစွမ်းအားမြှင့်မားဖို့အတွက် အာဟာရဖြစ်စေမယ့်အစားအစာများ များများစားသုံးပေးခြင်းတို့ကို ပြုလုပ်ကာ ရောဂါပိုးကူစက်ခြင်းမှ ကြိုတင်ကာကွယ်ထားပါ။

ဒါဆိုရင် ကိုယ်ခံစွမ်းအားမြှင့်မားဖို့အတွက် ဘယ်လိုအစားအစာတွေကို စားသုံးသင့်သလဲ။

အချဉ်ဓာတ်ကြွယ်ဝသော သစ်သီးများ

ဗီတာမင်စီဓာတ်ကြွယ်ဝသော လိမ္မော်သီး၊ ကမ္ဗလာသီး၊ သံပုယိုသီး၊ သံပုရာသီး၊ Grapefruit သီး စတဲ့ သစ်သီးများကို စားသုံးပေးခြင်းအားဖြင့် ကိုယ်ခံစွမ်းအားကို မြှင့်တင်လိုက်ပါ။ အအေးမိဖျားနာတဲ့သူတွေအတွက် ဗီတာမင်စီဓာတ်ကို များများမှီဝဲဖို့ လိုအပ်ပါတယ်။

ငရုတ်ပွအနီ

ဗီတာမင်စီဓာတ်အကြွယ်ဝဆုံးအစားအစာက သံပုယိုသီး၊ သံပုရာသီးတွေဖြစ်မယ်လို့ သင် ထင်ကောင်းထင်ပါလိမ့်မယ်။ ဒါပေမဲ့ ငရုတ်ပွအနီရဲ့ဗီတာမင်စီဓာတ်က ထိုအချဉ်ဓာတ်ကြွယ်ဝတဲ့အစားအစာတွေထက် နှစ်ဆပိုများပါတယ်။

ပန်းဂေါ်ဖီအစိမ်း

ဗီတာမင်စီအပြင်၊ ဗီတာမင်အေ၊ ဗီတာမင်အီး၊ အမျှင်ဓာတ်နဲ့ Antioxidants များ ကြွယ်ဝစွာပါဝင်တဲ့ ပန်းဂေါ်ဖီစိမ်းကို သင့်ရဲ့နေ့စဉ်စားသုံးရမယ့် ဟင်းလျာတစ်ခုအဖြစ် သတ်မှတ်ထားနိုင်ပါတယ်။

ကြက်သွန်ဖြူ

ကြက်သွန်ဖြူကတော့ သဘာဝကပေးအပ်တဲ့ ဆေးစွမ်းကောင်းတစ်လက်ပဲဖြစ်ပါတယ်။ ကြက်သွန်ဖြူက ကိုယ်ခံစွမ်းအားကို မြှင့်တင်ပေးရုံသာမက သွေးတိုးရောဂါ ခံစားရခြင်းမှလည်း ကာကွယ်ပေးနိုင်ပါတယ်။

ဂျင်း

နေမကောင်းဖြစ်ချင်တင်တင်ဖြစ်လာတာနဲ့ ဂျင်းကိုသာ သတိရလိုက်ပါ။ ဂျင်းက လည်ချောင်းနာခြင်းကိုလည်း သက်သာစေရုံသာမက ခေါင်းမူးခေါင်းကိုက်ဖြစ်ခြင်း၊ ကိုယ်လက်မအီမသာဖြစ်ခြင်းတို့ကို သက်သာစေကာ ကိုယ်ခံစွမ်းအားကို မြှင့်တင်ပေးနိုင်ပါတယ်။

အထက်ဖော်ပြပါ အစားအစာများအပြင် ဟင်းနုနွယ်ရွက်၊ ဒိန်ချဉ်၊ အယ်လ်မွန်သီး၊ နနွင်းမှုန့်၊ Green Tea၊ သင်္ဘောသီး၊ ကီဝီသီး၊ ကြက်သား၊ နေကြာစေ့ စတဲ့အစားအစာများအားလုံးက ကိုယ်ခံစွမ်းအားကို မြှင့်တင်ပေးနိုင်တဲ့အတွက်ကြောင့် ယခုအချိန်မှာ များများစားသုံးပေးခြင်းအားဖြင့် ကိုရိုနာဗိုင်းရပ်စ်ကူးစက်ရောဂါကို ကြိုတင်ကာကွယ်ထားလိုက်ကြရအောင်။

Source: Healthline.com