ကြက်သွန်မြိတ်များကို သေချာစွာ ထိန်းသိမ်းထားမယ်ဆိုရင် ရက်သတ္တလေးပတ်ကနေ ငါးပတ်အထိ အထားခံပါတယ်။ စာဖတ်သူအနေနဲ့ ကြက်သွန်မြိတ်များကို ကြာရှည်အထားခံအောင် ဘယ်လိုလျှို့ဝှက်ချက်တွေ အသုံးပြုရမလဲဆိုတာ စိတ်ဝင်စားနေလောက်ပြီလို့ ထင်ပါတယ်။

လျှို့ဝှက်နည်းလမ်းတွေကို သိချင်တယ်ဆိုရင်တော့ အခုပဲ ဆက်လေ့လာကြည့်လိုက်ရအောင်။

အရင်ဦးဆုံး ကြက်သွန်မြိတ်ကို စည်းထားတဲ့ သားရေကွင်းကို ဖယ်လိုက်ပါ။ ထို့နောက် ကြက်သွန်မြိတ်ရဲ့ အမြစ်များကို လှီးထုတ်လိုက်ပါ။

ထို့နောက် ကြက်သွန်မြိတ်ထည့်မယ့် အလုံပိတ်အိတ်ရဲ့အလျားပေါ် မူတည်ပြီး ကြက်သွန်မြိတ်ကို တစ်ဝက်တိတိ လှီးဖြတ်လိုက်ပါ။

လှီးဖြတ်ပြီးသော ကြက်သွန်မြိတ်က ရေစိုနေပါက တစ်သျှူးစဖြင့် ခြောက်အောင် သုတ်လိုက်ပါ။

ကြက်သွန်မြိတ်ခြောက်သွားပြီဆိုပါက တစ်သျှူးစရဲ့အလယ်တည့်တည့်မှာ ကြက်သွန်မြိတ်ထည့်လိုက်ပါ။ ထို့နောက် ကြက်သွန်မြိတ်ကို တစ်သျှူးဖြင့် ပတ်ထားလိုက်ပါ။ ပြီးတဲ့အခါ လေလုံအိတ်ထဲ ကြက်သွန်မြိတ်ကို ထည့်ထားပြီးနောက် ရေခဲသေတ္တာထဲ ထည့်သိမ်းထားရပါမယ်။

သတိပြုရန်အချက်များ

ရေခဲသေတ္တာထည့်ထားသော ကြက်သွန်မြိတ်အိတ်အပေါ်တွင် လေးလံသော ပစ္စည်းများ မတင်မိပါစေနဲ့။

တစ်ပတ်ပြည့်တိုင်း ရေခဲသေတ္တာထဲက ထုတ်ပြီး ကြက်သွန်မြိတ်များကို စစ်ဆေးပေးရပါမယ်။ ထိုကဲ့သို့ စစ်ဆေးတဲ့အခါ ရေစိုနေတဲ့ ကြက်သွန်မြိတ်များကို ခြောက်အောင် သုတ်လိုက်ပါ။

ကြက်သွန်မြိတ်များတွင် ပျော့နေသော အစိတ်အပိုင်းများ၊ နွမ်းနေသော အစိတ်အပိုင်းများ ရှိပါက ကတ်ကြေး (သို့) ဓားဖြင့် လှီးထုတ်လိုက်ပါ။

ထိုကဲ့သို့ စစ်ဆေးပြီးပါက စောစောက ဖော်ပြခဲ့သော အဆင့်များအတိုင်း တစ်ဆင့်ချင်းစီ ပြန်လည်သိမ်းဆည်းထားရပါမယ်။

ဒီနည်းလမ်းတွေကို အသုံးပြုမယ်ဆိုရင်တော့ သင့်အိမ်က ကြက်သွန်မြိတ်က အချိန်အကြာကြီး အထားခံနေမှာပဲဖြစ်ပါတယ်။

Source: mykoreankitchen.com