အားလုံးပဲ မင်္ဂလာပါ။ ထမင်းစားတဲ့အခါ ဟင်းရည်သောက်လေးပါမှ ထမင်းစားမြိန်သူများအတွက် ဒီတစ်ခါမှာတော့ ကိုရီးယားစတိုင်လ် ဝက်သား အာလူးဟင်းရည် ပြုလုပ်နည်းကို ဝေမျှပေးချင်ပါတယ်။
ပါဝင်ပစ္စည်းများ
- ဝက်သားပြား ၃ ပြား၊ ၄ ပြားခန့် (အတုံးခပ်ကြီးကြီး တုံးထားပါ)
- အာလူး တစ်လုံး (အခွံခွာပြီး ပါးပါးလှီးထားပါ)
- သခွားသီး တစ်ဝက် (ပါးပါးလှီးထားပါ)
- ကြက်သွန်နီ ၄ စိပ် ၁ စိပ် (ကုဗတုံးငယ်ပုံသဏ္ဍာန် လှီးဖြတ်ထားပါ)
- ဂျင်း ၃ ပြား
- ကိုရီးယား ပဲပိစပ်အနှစ် စားပွဲတင်ဇွန်း ၂ ဇွန်း
- ကြက်သွန်ဖြူ ၂ မြွှာ (ပါးပါးလှီးထားပါ)
- ကြက်သွန်မြိတ် ၂ ပင် (ပါးပါးလှီးထားပါ)
- သကြား လက်ဖက်ရည်ဇွန်း ၄ ပုံ ၁ ပုံ
- နှမ်းဆီ အနည်းငယ်
ပြုလုပ်နည်း အဆင့်ဆင့်
၁။ ဒယ်အိုးကို အပူပေးပြီး ဝက်သားပြားကို ၃ မိနစ်၊ ၄ မိနစ်ခန့် ကြော်ပေးလိုက်ပါ။ ဝက်သားများ အညိုရောင်ပြောင်းသွားပါက ပန်းကန်ပြားထဲ ပြောင်းထည့်ထားပါ။
၂။ အာလူး၊ ကြက်သွန်နီနှင့် သခွားသီးတို့ကိုလည်း ဆီမထည့်ဘဲ ၄ မိနစ်၊ ၅ မိနစ်ခန့် ကြော်ပေးလိုက်ပါ။
၃။ အာလူးများ နူးအိသွားတဲ့အခါမှာတော့ ဂျင်း၊ ကြက်သွန်ဖြူတို့ထည့်ပြီး သမအောင် မွှေပြီးတဲ့နောက်မှာတော့ ရေ ၂၅၀ မီလီလီတာထည့်ကာ သမအောင် မွှေပေးလိုက်ပါ။
၄။ ရေက ပွက်ပွက်ဆူလာတဲ့အခါမှာတော့ ပဲပိစပ်အနှစ်နှင့် သကြားတို့ထည့်ကာ သမအောင် မွှေပေးလိုက်ပါ။
၅။ မီးအပူချိန်ကို လျော့ပြီးတဲ့နောက်မှာတော့ အိုးအဖုံးဖွင့်လျက်သားဖြင့် ၁၀ မိနစ်ခန့် တည်ထားလိုက်ပါ။ မကြာခဏ မွှေပေးဖို့လည်း လိုအပ်ပါတယ်။
၆။ (၁၀) မိနစ်ပြည့်တဲ့အခါမှာတော့ ဝက်သားပြားကြော်ထည့်ကာ ၂ မိနစ်၊ ၃ မိနစ်ခန့် တည်ပေးလိုက်ပါ။
၇။ ထိုအဆင့်များ အားလုံးပြီးသွားတဲ့အခါမှာတော့ မီးဖိုပေါ်ကချကာ ဟင်းရည်ပန်းကန်လုံးထဲပြောင်းထည့်လိုက်ပါ။
၈။ နှမ်းဆီအနည်းငယ်နှင့် ကြက်သွန်မြိတ်တို့ ဖြူးထည့်ကာ ထမင်းနဲ့အတူတူ အရသာရှိရှိသုံးဆောင်နိုင်ပါပြီ။
Source: Spicetheplate.com
