အားလပ်ရက်လေးမှာ မိသားစု၊ သူငယ်ချင်း၊ မိတ်ဆွေအပေါင်းအသင်းတွေနဲ့ အရသာရှိတဲ့အစားအသောက်တွေကို တပျော်တပါးကြီး မလုပ်စားချင်ကြဘူးလား။
ဒါဆိုရင်တော့ ဟော့ပေါ့ လုပ်စားကြည့်ကြပါလို့ အကြံပေးချင်ပါတယ်။ မိမိအိမ်မှာပဲ ပင်လယ်စာဟော့ပေါ့ကို တပျော်တပါးကြီး ဘယ်လိုလုပ်စားကြမလဲဆိုတာကို အတူတူဆက်လေ့လာကြည့်လိုက်ရအောင်။
ပါဝင်ပစ္စည်းများ
• ဂဏန်း ၂ ကောင်
• ခုံး ၈ ကောင်
• ပြည်ကြီးငါး (သို့) ရေဘဝဲ ၈ အောင်စခန့်
• ပင်လယ်ငါး ၈ အောင်စ
• ပုစွန် ၈ ကောင်
• ပဲပင်ပေါက် ၆ အောင်စ
• မုန်ညှင်းဖြူ ၈ အောင်စ
• မုန်လာဥဖြူ ၃ အောင်စ
• မုန်လာဥနီ တစ်လုံး
• ကြက်သွန်နီ တစ်ခြမ်း
• အပ်မှို ၃ ခု
• ကြက်သွန်မြိတ် ၃ ပင်
• ကန်စွန်းရွက် ၃ အောင်စခန့်
• ရေ (သို့) အသားပြုတ်ရည် တစ်လီတာခန့်
• သံပုယိုရည် စားပွဲတင်ဇွန်း တစ်ဇွန်း
ငရုတ်နှစ်အရည် ဖော်စပ်ရန်အတွက် လိုအပ်သောပါဝင်ပစ္စည်းများ
• ပါးပါးလှီးထားသော ဂျင်း လက်ဖက်ရည်ဇွန်း တစ်ဇွန်း
• ပါးပါးလှီးထားသော ကြက်သွန်ဖြူ စားပွဲတင်ဇွန်း တစ်ဇွန်း
• ငရုတ်သီး ၈ တောင့်ခန့်
• ဆား လက်ဖက်ရည်ဇွန်းတစ်ဇွန်းနှင့် ပဲငံပြာရည် (သို့) ငါးငံပြာရည် စားပွဲတင်ဇွန်း နှစ်ဇွန်း
• ငရုတ်နှစ် စားပွဲတင်ဇွန်း နှစ်ဇွန်း
ပြုလုပ်နည်း အဆင့်ဆင့်
၁။ ခုံးထဲမှ သဲများကို ဖယ်ရှားဖို့ရန်အတွက် ခုံးကောင်များကို ဆားရေထဲမှာ မိနစ် ၃၀ ခန့် စိမ်ထားလိုက်ပါ။ ဂဏန်းရဲ့ အပေါ်ယံအခွံကို ဖယ်ရှားပြီးနောက် ရေဖြင့်သေသေချာချာဆေးကြောပေးလိုက်ပါ။ ပြည်ကြီးငါး (သို့) ရေဘဝဲနှင့် ငါးတို့ကို ရေဆေးပြီးနောက် အနေတော်အရွယ်အစား လှီးဖြတ်လိုက်ပါ။ ပုစွန်ကိုလည်း သန့်စင်အောင် ဆေးကြော်ထားပါ။
၂။ မုန်ညှင်း၊ မုန်လာဥနီ၊ ဥဖြူတို့ကို ကိုက်၍ရသောအနေအထားခန့် လှီးဖြတ်ထားပါ။ ကြက်သွန်နီနှင့် မှိုတို့ကို ပါးပါးလှီးဖြတ်ထားပါ။ ကြက်သွန်မြိတ်ကိုလည်း တစ်လက်မခွဲအရှည်ခန့် လှီးဖြတ်ထားပါ။
၃။ ငရုတ်နှစ်အရည် ဖော်စပ်ရန်အတွက် လိုအပ်သောပါဝင်ပစ္စည်းများ အားလုံးကို သမအောင် ရောမွှေလိုက်ပါ။ ထို့နောက် ရေ (သို့) အသားပြုတ်ရည် စားပွဲတင်ဇွန်း သုံးဇွန်းဖြင့် သမအောင် ထပ်မွှေပေးရပါမယ်။
၄။ ဟော့ပေါ့လုပ်စားမယ့် အိုးကြီးတစ်လုံးထဲသို့ ကန်စွန်းရွက်မှလွဲ၍ အခြားဟင်းရွက်များအားလုံးကို အစီအရီထည့်ထားလိုက်ပါ။
၅။ ထို့နောက် ပင်လယ်စာများကို ဟင်းရွက်များအပေါ်တွင် အစီအရီတင်ထားလိုက်ပါ။ စောစောက စပ်ထားသော ငရုတ်နှစ်များအားလုံးကို အိုးထဲသို့ ထည့်ပြီးနောက် အသားပြုတ်ရည်ကိုပါ တစ်ပါတည်း လောင်းထည့်လိုက်ပါ။ ထို့နောက် မီးအပူ ပြင်းပြင်းလေးဖြင့် တည်လိုက်ပါ။ ပင်လယ်စာများအားလုံး နူးအိသွားပြီဆိုမှ ကန်စွန်းရွက်များ ထည့်လိုက်ပါ။ ပြီးမှ သံပုယိုရည်များ လောင်းထည့်လိုက်ပါ။
ဒါဆိုရင်တော့ မိသားစုအားလုံး တစ်ပျော်တစ်ပါးကြီး စားသုံးနိုင်တဲ့ ပင်လယ်စာဟော့ပေါ့လေး ရရှိသွားပါပြီ။ မိမိကြိုက်နှစ်သက်ရာ အသားလုံးများကိုလည်း ထည့်စားနိုင်ပါသေးတယ်။
Source: Koreanbapsang.com
