ဝက်သား ဟင်းရွက်စုံထမင်းကြော်

အားလုံးပဲ မင်္ဂလာပါ။ ပုံမှန်ဆိုရင် ထမင်းကြော်ကြော်ရင် ကြက်ဥကို နောက်ဆုံးမှ ဖောက်ထည့်လေ့ရှိပါတယ်။ ဒါပေမဲ့ ဒီတစ်ခါမှာတော့ ကြက်ဥအစိမ်းကို ထမင်းနဲ့ သေသေချာချာနယ်ဖတ်ပြီးမှ ကြော်ရမယ့် ဝက်သား ဟင်းရွက်စုံထမင်းကြော် ပြုလုပ်နည်းကို ဝေမျှပေးချင်ပါတယ်။

ပုံမှန်ကြော်နေကျ ထမင်းကြော်တွေထက် ပိုအရသာရှိတယ်ဆိုတာကိုတော့ ကိုယ်တိုင်ကိုယ်ကျကြော်စားကြည့်မှပဲ သိမှာနော်။

ပါဝင်ပစ္စည်းများ

• ထမင်း ပန်းကန်လုံး ၂ လုံးစာခန့်
• ကြက်ဥ ၂ လုံး (ခပ်ပြင်းပြင်း မွှေခလောက်ထားပါ)
• နှမ်းဆီ စားပွဲတင်ဇွန်း ၁ ဇွန်း
• ဝက်သား ၇ အောင်စ (ကုဗတုံးပုံသဏ္ဍာန် တုံးထားပါ)
• ဟင်းရွက်စုံ ၃၀၀ ဂရမ် (ပြောင်းဖူး၊ မုန်လာဥနီ၊ ပဲတောင့်ရှည်၊ ရွှေပဲသီး စသည်)

• ကြော်လှော်ရန်ဆီ စားပွဲတင်ဇွန်း ၁ ဇွန်း
• ဆားနှင့် ငရုတ်ကောင်းမှုန့် အနည်းငယ်
• ကြက်သွန်မြိတ် ၁ ပင် (ပါးပါးလှီးထားပါ)

ပြုလုပ်နည်း အဆင့်ဆင့်

၁။ ထမင်းကို ပန်းကန်လုံးအကြီးတစ်လုံးထဲထည့်ပြီး ကြက်ဥနှင့် နှမ်းဆီတို့ဖြင့် သမအောင် နယ်လိုက်ပါ။

၂။ အိုးထဲသို့ ရေထည့်ပြီး ဟင်းသီးဟင်းရွက်များ အားလုံးကို ၂ မိနစ်ခန့် တည်ထားလိုက်ပါ။

၃။ ဒယ်အိုးထဲသို့ ဆီထည့်ပြီး ဆီပူလာပါက အသားတုံးများကို ၃ မိနစ်ခန့် ကြော်လိုက်ပါ။ အသားများ အညိုဖျော့ရောင် ပြောင်းသွားပါက ပန်းကန်ထဲသို့ ဆယ်ယူထားလိုက်ပါ (ဆီကိုတော့ ဒယ်အိုးထဲမှာ ချန်ထားခဲ့လိုက်ပါ)။

၄။ ထိုဒယ်အိုးထဲသို့ ကြက်ဥ၊ နှမ်းဆီတို့ဖြင့် နယ်ထားတဲ့ ထမင်း ထည့်ပြီး ၇ မိနစ်ခန့် ကြော်ပေးလိုက်ပါ။

၅။ မီးအပူချိန်ကို ထပ်မြင့်လိုက်ပြီး ဟင်းသီးဟင်းရွက်များကို ထမင်းထဲ ထည့်ကြော်လိုက်ပါ။

၆။ ဆားနှင့် ငရုတ်ကောင်းတို့ ထည့်ပြီး အရသာအပေါ့အငန် မြည်းကြည့်လိုက်ပါ။