အကြော်အလှော်ဟင်းလျာတွေကို ကြိုက်နှစ်သက်သူများအတွက် ဒီတစ်ခါမှာတော့ အမဲသားနဲ့ ကြက်ဥရောကြော်ထားတဲ့ ဟင်းလျာ ချက်ပြုတ်ပြင်ဆင်နည်းကို ဝေမျှပေးချင်ပါတယ်။
ပါဝင်ပစ္စည်းများ
- ကြက်ဥ ၃ လုံး
- ဟင်းသီးဟင်းရွက်ဆီ စားပွဲတင်ဇွန်း ၃ ဇွန်း
- ပြောင်းမှုန့် လက်ဖက်ရည်ဇွန်း ၂ ဇွန်း
- ငရုတ်ကောင်းမှုန့်နှင့် ဆားအနည်းငယ်
- ဟင်းချက်ဝိုင် စားပွဲတင်ဇွန်း တစ်ဇွန်း
- အမဲသား ၁၀၀ ဂရမ်
- ပဲငံပြာရည်အကြည် စားပွဲတင်ဇွန်း တစ်ဝက်
ကြက်ဥမွှေခလောက်ဖို့ရန်အတွက် လိုအပ်သောပါဝင်ပစ္စည်းများ
- ပဲငံပြာရည် အကြည် စားပွဲတင်ဇွန်း တစ်ဝက်
- ငရုတ်ကောင်းမှုန့် လက်ဖက်ရည်ဇွန်း ၄ ပုံ ၁ ပုံ
- တရုတ်ဟင်းချက်ဝိုင် စားပွဲတင်ဇွန်း တစ်ဝက်
- ဆား လက်ဖက်ရည်ဇွန်း ၈ ပုံ ၁ ပုံ
ပြုလုပ်နည်း အဆင့်ဆင့်
၁။ အမဲသားတုံးများကို အနေတော်အတုံး တုံးထားပြီးနောက် ဆား၊ ပဲငံပြာရည်အကြည်၊ ဟင်းချက်ဝိုင်တို့ဖြင့် နယ်ဖတ်ထားလိုက်ပါ။ ထို့နောက် ပြောင်းမှုန့်နှင့် ရေ လက်ဖက်ရည်ဇွန်း ၂ ဇွန်းခန့် ထပ်ထည့်ပြီး သမအောင် နယ်ပေးလိုက်ပါ။ အသားထဲစိမ့်ဝင်သွားဖို့ရန်အတွက် ၁၅ မိနစ်ခန့် စိမ်ထားလိုက်ပါ။ အမဲသား ကြော်ခါနီးကျမှ ဆီ စားပွဲတင်ဇွန်း ၁ ဇွန်းဖြင့် ထပ်နယ်ပေးရပါမယ်။
၂။ ပန်းကန်လုံးတစ်လုံးထဲသို့ ကြက်ဥများ ဖောက်ထည့်လိုက်ပြီး ငရုတ်ကောင်းမှုန့်၊ ပဲငံပြာရည်အကြည်၊ ဟင်းချက်ဝိုင်နှင့် ဆားတို့ထည့်ပြီး သမအောင် ခပ်ပြင်းပြင်းလေး မွှေခလောက်ထားလိုက်ပါ။
၃။ ဒယ်အိုးကို အပူပေးပြီး ဆီ စားပွဲတင်ဇွန်း ၂ ဇွန်းထည့်ပေးလိုက်ပါ။ ဆီပူလာပါက အမဲသားတုံးများထည့်ကြော်ပေးလိုက်ပါ။
၄။ အမဲသားတုံးများ အရောင်ပြောင်းသွားပါက မွှေခလောက်ထားသော ကြက်ဥများကို အိုးထဲသို့ လောင်းထည့်လိုက်ပါ။ ထို့နောက် အမဲသားဖြင့် ရောကြော်ပေးရပါမယ်။
ကြက်ဥ မကျက်တကျက်အချိန်မှာ အမဲသားကြော်များကို အိုးထဲမှ ဆယ်ယူပြီး ပန်းကန်ထဲ ပြောင်းထည့်ထားလိုက်ပါ။
ဒါဆိုရင်တော့ အရသာရှိတဲ့ အမဲသားကြက်ဥမွှေကြော် ဟင်းလျာလေး ရရှိသွားပါပြီ။
ထမင်းနဲ့ အရသာရှိရှိ သုံးဆောင်လိုက်ပါ။
Source: Chinasichuanfood.com
