အားလုံးပဲ မင်္ဂလာပါ။ ဒီတစ်ခါမှာတော့ ထမင်းနဲ့ တွဲဖက်စားရင်လည်း လိုက်ဖက်မှုရှိသလို သူ့ချည်းပဲ စားမယ်ဆိုရင်လည်း အရသာရှိတဲ့ ကြက်သားဆာတေး ပြုလုပ်နည်းကို ဝေမျှပေးချင်ပါတယ်။
ပါဝင်ပစ္စည်းများ
- ကြက်ပေါင် ၆၈၀ (ဂမ် (အရိုးနှင့် အရေခွံတို့ကို ဖယ်ပြီး အတုံးငယ် တုံးထားပါ)
- အုန်းနို့ ၆၀ မီလီလီတာ
- ငါးငံပြာရည် လက်ဖက်ရည်ဇွန်း ၂ ဇွန်း
- ပဲငံပြာရည် လက်ဖက်ရည်ဇွန်း ၂ ဇွန်း
- ငရုတ်သီးအနှစ် လက်ဖက်ရည်ဇွန်း ၂ ဇွန်း
- သကြား လက်ဖက်ရည်ဇွန်း တစ်ဝက်
- သံပုယိုရည် စားပွဲတင်ဇွန်း ၁ ဇွန်း
- ဆီ စားပွဲတင်ဇွန်း ၂ ဇွန်း
ပြုလုပ်နည်း အဆင့်ဆင့်
၁။ အကင်တုတ်ထိုးကို တစ်နာရီခန့် ရေစိမ်ထားပေးလိုက်ပါ။ ထိုကဲ့သို့ ရေစိမ်ထားခြင်းက အကင်တုတ်ထိုးများ မီးလောင်ကျွမ်းခြင်းမှ ကာကွယ်ပေးနိုင်ပါတယ်။
၂။ ကြက်သားကို အုန်းနို့၊ ငါးငံပြာရည်၊ ပဲငံပြာရည်၊ ငရုတ်သီးအနှစ်၊ သကြား၊ သံပုယိုရည်တို့ဖြင့် သမအောင် နယ်ဖတ်ပြီးတဲ့နောက်မှာ မိနစ် ၃၀ ခန့် နှပ်ထားလိုက်ပါ။ တစ်ညခန့် ထားထားမယ်ဆိုရင်တော့ ပိုမိုအရသာရှိပါတယ်။
၃။ ထိုကဲ့သို့ နှပ်ထားပြီးတဲ့နောက်မှာ ကြက်သားတုံးများကို အကင်တုတ်ထိုးထဲတွင် ထိုးထည့်ထားလိုက်ပါ။ တစ်ချောင်းကို ၄ တုံးမှ ၇ တုံးအထိ ထိုးထည့်နိုင်ပါတယ်။
၄။ ဒယ်အိုးအပြားကို အပူပေးပြီး ဆီ စားပွဲတင်ဇွန်း ၂ ဇွန်းထည့်ပါ။ ဆီပူလာပါက ကြက်သားတုတ်ထိုးများထည့်ကာ ၁၀ မိနစ်ခန့် ကင်ပေးလိုက်ပါ။ ထို့နောက် အခြားတစ်ဖက်သို့လှန်ကာ နောက်ထပ် ၁၀ မိနစ် ထပ်ကင်ပေးလိုက်ပါ။ (သင့်အနေနဲ့ ဒယ်အိုးနဲ့ မကင်ချင်ဘဲ အကင်မီးဖိုဖြင့် ကင်ပေးမယ်ဆိုလည်း ရပါသေးတယ်။)
ဒါဆိုရင်တော့ ကြက်သားဆာတေးလေး ရရှိသွားပါပြီ။ မိမိကြိုက်နှစ်သက်ရာအချဉ်ရည်၊ ဆော့စ်တို့ဖြင့် အရသာရှိရှိ တွဲဖက်စားသုံးနိုင်ပါတယ်။
Source: Thewoksoflife.com
