ကိုရီးယားစတိုင်လ် ချဉ်ချဉ်စပ်စပ် ဝက်နံရိုး အာလူးစွပ်ပြုတ်

အားလုံးပဲ မင်္ဂလာပါ။ ထမင်းစားတဲ့အခါ စွပ်ပြုတ်ပူပူစပ်စပ်လေးနဲ့ စားရမယ်ဆိုရင် အင်မတန်ကို စားမြိန်စေပါတယ်။ အထူးသဖြင့် ကိုရီးယားကားတွေ ထဲမှာ ထမင်းစားခန်းပါလာပြီဆို သူတို့စားနေတာမြင်ရရင် ကြည့်နေရင်း အလိုလိုဗိုက်ဆာလာတဲ့ခံစားချက်မျိုး ခံစားဖူးကြမှာပေါ့နော်။

ဒါ့ကြောင့် ဒီတစ်ခါမှာတော့ ကိုရီးယားစတိုင်လ် ဝက်နံရိုး အာလူးစွပ်ပြုတ် ချဉ်ချဉ်စပ်စပ် ပြုလုပ်နည်းကို ဝေမျှပေးလိုက်ပါတယ်။

ပါဝင်ပစ္စည်းများ

ဝက်နံရိုး ၂ ပေါင် ခန့်
ကြက်သွန်နီ ဥသေး တစ်ခြမ်း
ကြက်သွန်ဖြူ ၅ မွှာ
အကွင်းလိုက် ပါးပါးလှီးထားသော ချင်းအနည်းငယ်
မုန်ညင်းရွက် ၅ အောင်စ (သို့) ၆ အောင်စခန့်
အာလူး ၃ လုံး (အဆင်သင့်ပြုတ်ထားလိုက်ပါ)
ငရုတ်သီးမုန့် စားပွဲတင်ဇွန်း ၂ ဇွန်း
ပဲငံပြာရည်အနှစ် စားပွဲတင်ဇွန်း ၁ ဇွန်း
ဆား
ငရုတ်ကောင်းမုန့်

ပြုလုပ်နည်းအဆင့်ဆင့်

ဝက်နံရိုးကို ရေအေးထဲမှာ တစ်နာရီစိမ်ထားပါ။ မိနစ် ၃၀ မှာ ရေတစ်ခါလဲပေးရပါမယ်။

ရေစိမ်ပြီးသော ဝက်နံရိုးများကို အိုးကြီးတစ်လုံးထဲထည့်ပြီး ၇ မိနစ်၊ ၈ မိနစ်ခန့် ပြုတ်လိုက်ပါ။

ထို့နောက် ဝက်နံရိုးများကို ဆယ်ယူပြီး ရေဆေးပါ။ အိုးကိုပါ တစ်ခါတည်း ဆေးလိုက်ပါ။ ဆေးပြီးသော အိုးကို မီးဖိုပေါ်ပြန်တင်ပြီး ရေ ၈ ခွက်ထည့်ကာ ဝက်နံရိုးများ၊ ကြက်သွန်နီတစ်ခြမ်း၊ ချင်း၊ ကြက်သွန်မြိတ်ထည့်ပြီး အဖုံးမဖုံးဘဲ ၁၀ မိနစ်ခန့် အပူချိန်ပြင်းပြင်းနဲ့တည်ထားပါ။ ထို့နောက် အပူချိန်ကို အလယ်အလတ်ပြန်လျော့လိုက်ပြီး အဖုံးအုပ်ထားကာ မိနစ် ၅၀ ခန့် တည်ထားပါ။

ဝက်နံရိုးတည်ထားတဲ့အချိန်မှာ ဟင်းအနှစ် စပ်စပ်ကလေးဖြစ်အောင် ဖော်စပ်ရပါမယ်။ ပန်းကန်လုံးတစ်လုံးထဲကို ငရုတ်သီးမုန့် စားပွဲတင်ဇွန်း ၂ ဇွန်း၊ ပဲငံပြာရည် အနှစ် စားပွဲတင်ဇွန်း ၁ ဇွန်း၊ ပါးပါးလှီးထားသော ကြက်သွန်ဖြူ စားပွဲတင်ဇွန်း ၁ ဇွန်း၊ ဆားနဲ့ ငရုတ်ကောင်းမှုန့်တို့ကို ထည့်ပြီး သမအောင် ရောမွှေလိုက်ပါ။