BBQ Chicken Poppers ဆိုရင်တော့ လူတိုင်းပဲကြိုက်နှစ်သက်မယ်လို့ ထင်ပါတယ်။ အပြင်မှာဝယ်စားမယ်ဆိုရင် ဈေးလည်းကြီးပြီး ပါတာကလည်းနည်းတော့ စားရတာမဝတဲ့သူတွေလည်း ရှိမှာပါ။ အိမ်မှာလုပ်စားမယ်ဆိုရင် ကိုယ်ကြိုက်သလောက် ကြက်သားကိုဝယ်ပြီး လုပ်စားလို့ရပါတယ်။ ဒါကြောင့် BBQ Chicken Poppers ကို အိမ်မှာလွယ်ကူစွာကြော်စားနိုင်မယ့်နည်းလမ်းကို မျှဝေပေးလိုက်ပါတယ်။

BBQ Chicken Poppers ပြုလုပ်ဖို့အတွက် ကြက်ရင်အုံသား – ၂ ခုကို အတုံးလေးတွေဖြစ်အောင်လှီးပြီး ပန်းကန်ထဲထည့်ပေးပါ။ ပြီးရင်တော့ ဆား – လက်ဖက်ရည်ဇွန်း ၂ ဇွန်း၊ ငရုပ်ကောင်းမှုန့် – လက်ဖက်ရည်ဇွန်း ၁ ဇွန်း၊ ကြက်သွန်ဖြူအမှုန့် – လက်ဖက်ရည်ဇွန်း ၁ ဇွန်းနဲ့ ငရုပ်သီးအစိမ်းမှုန့် – လက်ဖက်ရည်ဇွန်း ၁ ဇွန်းတို့ကိုထည့်ပြီး နယ်ပေးပါ။

သမအောင်နယ်ပြီးသွားတဲ့အခါမှာတော့ ကြက်သားတစ်တုံးချင်းစီကိုယူပြီး ဂျုံမှုန့်ပန်းကန်ထဲထည့်နယ်ပေးပါ။ ပြီးရင် ကြက်ဥခလောက်ထားတဲ့ပန်းကန်ထဲ ထည့်စိမ်ပါ။ ပြီးရင်တော့ ဂျုံမှုန့်ပန်းကန်ထဲ ပြန်ထည့်နယ်ပေးပါ။ ပြီးတာနဲ့ ဆီအိုးထဲထည့်ပြီး ကြော်လို့ရပါပြီ။ ကြော်ပြီးတာနဲ့ ပန်းကန်ထဲခူးထုတ်လိုက်ပါ။

နောက်ထပ်ဒယ်အိုးတစ်လုံးထဲကို BBQ Sauce (BBQ ဆော့စ်) – ခွက်တစ်ဝက်စာထည့်မွှေပြီး ပွက်ပွက်ဆူလာရင်တော့ ခုနကကြော်ထားတဲ့ ကြက်သားတွေကို ထည့်ကြော်ပေးပါ။ ဆော့စ်တွေခမ်းပြီး ကြက်သားမှာ အကုန်ကပ်သွားပြီဆိုတော့မှ ပန်းကန်ထဲခူးထုတ်လိုက်ပါ။

ဒါဆိုရင်တော့ အရသာရှိလွန်းတဲ့ BBQ Chicken Poppers ကို ရရှိသွားပါပြီ။ ဒီတိုင်းလေးစားလည်း မိုက်သလို၊ ထမင်းနဲ့လည်း စားလို့ရပါသေးတယ်။ ဒါ့အပြင် အရက်သောက်ရင်း အမြည်းလေးလုပ်မယ်ဆိုလဲ ရှယ်ပဲနော်။

Photo Source: www.tasty.com