ကြက်သွန်မြိတ်လေးတွေနဲ့ အရသာရှိတဲ့ ကိုရီးယားပန်ကိတ်လေးလုပ်စားကြမယ်

အခုချိန်မှာဆိုရင် မြို့ထဲကိုသွားလိုက်တာနဲ့ ကိုရီးယားစားသောက်ဆိုင်လေးတွေ နေရာအနှံ့အပြားမှာ မြင်တွေ့နေရပါပြီ။ တချို့ဆိုင်လေးတွေကတော့ စားလို့ကောင်းပေမယ့် တချို့ဆိုင်လေးတွေကျတော့ လက်ရာသိပ်မကောင်းချင်ကြပါဘူး။

ဟိုလိုကပေါ့လို့ ဒီလိုလေးကငန်သွားလို့ဆိုပြီး အလွယ်တကူ စိတ်တိုင်းမကျတတ်တဲ့ Foodie လေးများအတွက် ကိုရီးယားအစားအစာတွေထဲကမှ ပန်ကိတ်လေးကို အိမ်မှာပဲ စိတ်တိုင်းကျ ကြော်စားကြည့်လိုက်ပါ။

ပါဝင်ပစ္စည်းနည်းနည်းလေးနဲ့ လုပ်နည်းလေးကလွယ် မြန်ဆန်လွယ်ကူလို့ မိသားစုတွေနဲ့ တပျော်တပါး စားနိုင်ပြီပေါ့။

ပါဝင်ပစ္စည်းများ

ကြက်သွန်မြိတ် – ၅ ပင်
ဂျုံမှုန့် – ၁၅၀ ဂရမ်
မုန့်ဖုတ်ဆိုဒါ – လက်ဖက်ရည်ဇွန်း 1/4
မုန့်ဖုတ်ပေါင်ဒါ – လက်ဖက်ရည်ဇွန်း 1/4
ရေ – ခွက် 2/3

ပြင်ဆင်ပုံအဆင့်ဆင့်

၁။ ကြက်သွန်မြိတ်ကို အလယ်ကနေ ထက်ခြမ်းလှီးလိုက်ပြီးတော့ အရိုးပိုင်းကို ဖြတ်ထုတ်လိုက်ပါ။

၂။ ပန်းကန်လုံးတစ်ခုထဲမှာ ပန်ကိတ်ဂျုံမှုန့်၊ မုန့်ဖုတ်ဆိုဒါ၊ မုန့်ဖုတ်ပေါင်ဒါနှင့် ရေတို့ကို ရောစပ်၍ မုန့်နှစ်ဖြစ်လာတဲ့အထိ သေသေချာချာမွှေပေးပါ။

၃။ ဒယ်အိုးပြားထဲမှာ ဆီကိုအပူပေးပြီး ကြက်သွန်မြိတ်တွေကို ပုံမှာပြထားတဲ့အတိုင်းထည့်ပြီးတော့ မီးအနေတော်မှာ ၂ မိနစ်လောက် ကြော်ပေးပါ။

၄။ ပြီးရင် မုန့်နှစ်တွေကို ကြက်သွန်မြိတ်တွေပေါ်မှာ နှံ့သွားအောင် သေချာလောင်းပေးလိုက်ပါ။ မီးအနေတော်မှာ ၃-၄ မိနစ်လောက် ချက်ပါ။

၅။ အချိန်ပြည့်ရင် ပန်ကိတ်ကို နောက်တစ်ဖက်လှန်လိုက်ပြီး ဆီစမ်းလိုက်ကာ နောက်ထပ် ၃-၄ မိနစ်ထပ်ချက်ပါ။ နှစ်ဖက်လုံးသေချာကျက်သွားတဲ့အထိ ဟိုဖက်ဒီဖက်လှန်ပြီး ချက်ပေးပါ။