အားလုံးပဲ မင်္ဂလာပါ။ ထမင်းလိပ်ကြိုက်နှစ်သက်သူများအတွက် ဒီတစ်ခါမှာတော့ ပြုလုပ်ရလွယ်ကူပြီး အရသာရှိတဲ့ ဂျပန်ရေညှိထမင်းလိပ်ပြုလုပ်နည်းကို ဝေမျှပေးချင်ပါတယ်။
ပါဝင်ပစ္စည်းများ
- ဆန် ၇၀၀ ဂရမ်
- ဆော်လမွန်ငါး ၁၂၀ ဂရမ်နှင့် တူနာငါး ၁၂၀ ဂရမ်
- ဂျင်း ၆ ဂရမ် (ပါးပါးလှီးထားပါ)
- မိရောနိစ် ၃၀ မီလီလီတာ
- ဟင်းသီးဟင်းရွက်ဆီ စားပွဲတင်ဇွန်း ၂ ဇွန်း
- ဂျပန်ရေညှိ ၂ ပြားခန့်
- အဖြူရောင် နှမ်းစေ့ စားပွဲတင်ဇွန်း ၁ ဇွန်း
- ရှာလကာရည် ၅၀ မီလီလီတာနှင့် ပဲငံပြာရည်အကြည် ၃၅ မီလီလီတာ
- သကြား ၇၅ ဂရမ်နှင့် ဆား ၅ ဂရမ်
- ရေ ၆၀၀ မီလီလီတာ
ပြုလုပ်နည်း အဆင့်ဆင့်
၁။ ဆန်ကို ရေစင်အောင် ဆေးကြောပြီးနောက် ထမင်းပေါင်းအိုးထဲထည့်ကာ တည်ထားလိုက်ပါ။
၂။ အိုးတစ်လုံးကို အပူပေးပြီး ရှာလကာရည်ထည့်ကာ ဆား ၅ ဂရမ်နှင့် သကြား ၄၀ ဂရမ်တို့ထည့်ပြီး ဆားများ ပျော်ဝင်သွားသည်အထိ တည်ထားလိုက်ပါ။ ဒီဆော့စ်ကတော့ ထမင်းနယ်တဲ့အခါ အသုံးပြုရမယ့်ဆော့စ်ပါ။
အခြားအိုးတစ်လုံးကို အပူပေးပြီး ပဲငံပြာရည်အကြည်၊ သကြား ၃၅ ဂရမ်နှင့် ဂျင်းတို့ထည့်ပြီး မွှေပေးကာ သကြားများ အရည်ပျော်သွားသည်အထိ တည်ပေးလိုက်ပါ။ ဒီဆော့စ်ကတော့ ဆော်လမွန်ငါးကြော်တဲ့အခါ အသုံးပြုရမယ့် ဆော့စ်ပါ။
၃။ ဒယ်အိုးကို အပူပေးပြီး ဟင်းသီးဟင်းရွက်ဆီ စားပွဲတင်ဇွန်း ၁ ဇွန်းထည့်ကာ ဆီပူလာပါက ဆော်လမွန်ငါးများကို ၃ မိနစ်မှ ၅ မိနစ်ကြော်လိုက်ပါ။ ထို့နောက် ဆော့စ် စားပွဲတင်ဇွန်း ၆ ဇွန်းထည့်ကာ ၂ မိနစ်ခန့် ထပ်ကြော်ပေးရပါမယ်။
၄။ အခြားဒယ်အိုးတစ်လုံးကို အပူပေးပြီး ဆီ စားပွဲတင်ဇွန်း ၁ ဇွန်းထည့်ကာ တူနာငါးများကို ၃ မိနစ်မှ ၅ မိနစ်ခန့် ကြော်ပေးလိုက်ပါ။
၅။ ထမင်းများ ကျက်သွားပါက ဇလုံအကြီးတစ်လုံးထဲထည့်ပြီး ပထမအဆင့်က ပြင်ဆင်ထားသော ဆော့စ်များ ထည့်ကာ သမအောင် နယ်ပေးလိုက်ပါ။
၆။ ထို့နောက် ထမင်းအနည်းငယ်ကို လက်ဖဝါးပေါ်တင်လိုက်ပြီး တြိဂံပုံသဏ္ဍာန် ပြားနေအောင် လက်ဖဝါးဖြင့် ဖိပေးလိုက်ပါ။ ပြီးရင် တူနာငါးအနည်းငယ်၊ ဆော်လမွန်ငါး အနည်းငယ်ကို ထမင်းရဲ့အလယ်ဗဟိုတည့်တည့်မှာ ထားထားပြီးနောက် ထမင်းရဲ့ဘေးအနား ၃ ဘက်ကို အလယ်ဗဟိုတွင် စုဆုံပေးလိုက်ပါ။ ဒါဆိုရင်တော့ တြိဂံပုံသဏ္ဍာန် ထမင်းလိပ်ရသွားပါပြီ။
၇။ ရေညှိကိုတော့ ၂ လက်မအကျယ်ခန့် လှီးဖြတ်ပြီးနောက် ထမင်းရဲ့ဘေးတစ်ဖက်မှာ ကပ်ပေးလိုက်ပါ။
ဒါဆိုရင်တော့ အရသာရှိတဲ့ ဂျပန်ရေညှိထမင်းလိပ် ရရှိသွားပါပြီ။
Source: Asianfoodchannel.com
