နေ့လည်နေ့ခင်း သရေစာဘာစားရမလဲစဉ်းစားနေသူတွေအတွက် ဒီယိုပြုလုပ်နည်းလေးကို ဖော်ပြလိုက်ရခြင်းဖြစ်ပါတယ်။ အချိုပွဲအနေနဲ့ ပေါင်မုန့်တွင် လိမ္မော်-ရှောက် မားမလိတ် ကိုသုတ်စားမယ်ဆိုရင် အလွန်အရသာရှိတဲ့အတွက် ကလေးများအကြိုက် အရသာနဲ့ အိမ်သားများဖြင့်အတူ လုပ်စားကြည့်နိုင်ပါတယ်။
ပါဝင်ပစ္စည်းများ
လိမ္မော်သီး – ၆ လုံး
ရှောက်သီး – ၄ လုံး
ရေ – လိုအပ်သရွေ့
သကြား – လိုအပ်သရွေ့
ပြင်ဆင်ပြုလုပ်ပုံ
လိမ္မော်သီးနှင့် ရှောက်သီးကို ပါးနိုင်သမျှ ပါးအောင် လှီးပြီး အစေ့ထုတ်ပစ်ပါ။ ရေကို အသီး၏သုံးဆထည့်ပြီး (၁၂) နာရီကြာအောင်ထားပါ။ ပြီးမှ ယင်းကို တစ်နာရီခန့်ကျိုပါ။ ကျိုပြီးနောက် (၁၂) နာရီကြာ ပြန်ထားပါ။ ထို့နောက် တစ်နာရီထပ်ကျိုပါ။ သစ်သီးကျိုထားသည့် အရည်ကို ချိန်လိုက်လျှင် ပြုတ်ရည် နို့ဆီဘူးတစ်ဘူးဆိုပါက သကြားနို့ဆီဘူးတစ်ဘူးစာထည့်ရပါမည်။ ပြီးလျှင် ကျောက်ကျောရည်များကဲ့သို့ အနေအထားရလာသည်အထိ ကျိုရပါမည်။ လိုအပ်သောအနေအထားသို့ ရောက်ပြီဆိုပါက ယင်းကို ပန်းကန်ပြားငယ်တွင် အနည်းငယ်ထည့်၍ စမ်းသပ်နိုင်ပါတယ်။ ဂျယ်လီကဲ့သို့ ဖြစ်နေပြီဆိုပါလျှင် ပုလင်းထဲထည့်၍ စားနိုင်ပါပြီ။
(ယခုနည်းအတိုင်း ဂရိတ်ဖရု၊ ကျွဲကောသီးများကိုလည်း နှစ်သက်ပါက ထည့်သွင်း၍ အသုံးပြုနိုင်ပါတယ်။ လိမ္မော်သီးတွင် ရှောက်သီးမထည့်ဘဲနှင့်လည်း အသုံးပြုနိုင်ပါတယ်။ ရှောက်သီးသည် အနံ့အတွက် အသုံးပြုထားခြင်းသာဖြစ်ပါတယ်။ ဤနည်းအတိုင်း သံပရာသီးကို အသုံးပြု၍လည်း ရပါတယ်။)
