ဝက်သားကိုနာနတ်သီးနဲ့ရောပြီး အရသာရှိရှိချက်စားကြည့်ရအောင်

ဝက်သားဟင်းချည်းပဲစားရတာရိုးလာရင် အသစ်အဆန်းလေးဖြစ်ပြီး အရသာတစ်မျိုးနဲ့ ပိုစားလို့ကောင်းအောင် ဝက်သားကိုနာနတ်သီးနဲ့ရောပြီး အရသာရှိရှိချက်စားကြည့်ပါ။ ချက်ရတာလည်း မခက်တဲ့အတွက် နာနတ်သီးကြိုက်တဲ့သူတွေဆိုရင်တော့ ချက်စားကြည့်သင့်ပါတယ်နော်။

ဝက်ခေါက် (သို့) အဆီနဲ့အသားတွဲရက် ဝက်သား – ၂ ပေါင်ကို အနေတော်အတုံးတွေတုံးထားပါ။

ဒယ်အိုးထဲကို ဆီနည်းနည်းထည့်ပြီး ဝက်သားတွေထည့်ကြော်ပါမယ်။ ကြော်ပြီးရင် ပန်းကန်ထဲခူးထုတ်ပါမယ်။

ဒယ်အိုးထဲမှာကျန်တဲ့ဆီနဲ့ပဲ ကြက်သွန်နီ – ၂ လုံးကို လှီးထည့်ပြီး ကြော်ပါမယ်။ အုန်းနို့ – ခွက်တစ်ဝက်စာထည့်ပါမယ်။ ပဲငံပြာရည်အကြည် – စားပွဲတင်ဇွန်း ၂ ဇွန်း၊ ရှာလကာရည် – စားပွဲတင်ဇွန်း ၂ ဇွန်း၊ ငရုပ်ကောင်းမှုန့် – လက်ဖက်ရည်ဇွန်း ၁ ဇွန်းထည့်ပြီး မွှေပေးပါ။

ခုနကကြော်ထားတဲ့ ဝက်သားတွေကိုထည့်ပါမယ်။ ရေနည်းနည်းထပ်ထည့်ပြီး ခဏတည်ထားပါမယ်။

နာနတ်သီးတွေကို ပန်းကန်လုံးတစ်လုံးစာရအောင် အနေတော်လောက်လေးတွေ လှီးထားပါ။ ပြီးတာနဲ့ ဒယ်အိုးထဲကို ဆီနည်းနည်းထည့်ပြီး နာနတ်သီးတွေ ထည့်ကြော်ပါမယ်။

ဝက်သားလည်းနူးပြီဆိုရင် ကြော်ထားတဲ့နာနတ်သီးတွေကိုပါ ဝက်သားအိုးထဲ ရောထည့်ပြီး မွှေပေးပါ။ ခဏလောက်တည်ထားပြီး အပေါ်ကနေ နံနံပင်လေးအုပ်ပေးလိုက်ရင်တော့ အနံ့ပိုမွှေးသွားမှာပါ။