မိုးရာသီမှာ လှိုင်လှိုင်ထွက်တဲ့ ငရုတ်သီးစိမ်းလေးတွေနဲ့ ခပ်စပ်စပ်လေး ချက်စား ရအောင်နော် ။ ငရုတ်သီးစိမ်း အမျိုးအစားတွေက မိုးမျှော် ၊ ကုလားအော် စသည်ဖြင့် အမျိုးမျိုးရှိတဲ့ အထဲက ကျမကတော့ ရှမ်းပြည်နယ်ကထွက်တဲ့ ရှမ်းငရုတ်သီးကို သုံးထားပါတယ်နော်။
လိုအပ်သောပစ္စည်းများ
- ငရုတ်သီးစိမ်း – ဟင်းပန်းကန်လုံး ၁ လုံးစာ
- ဗမာကြက်သွန်ဖြူ – ၁ ဥ
- ကြက်သွန်နီ – အသေး ၄ လုံး
- ပုစွန်ခြောက်မှုန့် – ထမင်းစားဇွန်း ၂ ဇွန်း
- မြိတ်ငါးပိ – လက်ဖက်ရည်ဇွန်း ၁ ဇွန်း
- ပဲဆီ အနည်းငယ်
ချက်ပြုတ်နည်း
- ငရုတ်သီးစိမ်းများကို ရေစင်အောင် ဆေးပြီး ဆားထည့်၍ ကြေညက်အောင် ကြိတ်ပေးပါ။ ငရုတ်ဆုံ သုံးပြီး ထောင်းလည်း ရပါတယ်။ ဗမာ ကြက်သွန်ဖြူကို အပေါ်ယံ အခွံမာ သာခွါပြီး အခွံပါးပါ ကျေညက်သည် အထိ ထောင်းပါ။
- ကြက်သွန်နီ ၊ ပုဇွန်ခြောက်မှုန့်များပါ တစ်ခါတည်း ထည့်ထောင်းပါ။ မြိတ်ငါးပိကို ရေနွေး အနည်းငယ်ဖြင့် ရောပြီး ဖျော်ထားပါ။
- ထောင်းထားတဲ့ ကြက်သွန်ဖြူ နီ ၊ ပုဇွန်ခြောက် အရောထောင်းကို ဆီ အနေတော် ထည့်ထားတဲ့ ဒယ်အိုးထဲမှာ Medium Heat ဖြင့် ရွှေညိုရောင် သန်းပြီး မွှေးလာသည် အထိ ကြော်ပေးပါ။ ကြက်သွန်ဖြူ နီ ဆီသတ်တာ ရွှေညိုရောင်သန်းပြီ ဆိုတာနဲ့ ငါးပိရည်ဖျော်ကို ထည့်ပြီး ငါးပိအနံ ပျောက်သည်အထိ မွှေကြော်ပေးပါ။
- ထောင်းထားတဲ့ ငရုတ်သီးစိမ်းများ ထည့်ပါ။ ယိုးဒယားငံပြာရည် ထည့်ပါ။ ငရုတ်သီးများ အနည်းငယ်နွမ်းလာလျင် ချလို့ရပါပြီ။
- ငရုတ်သီးထောင်းတဲ့ နေရာမှာ ဆားထည့် ထောင်းတာ ငရုတ်သီးရဲ့ အရောင် မည်းမသွားအောင်ပါ။ ဆားထည့်ပြီး ထောင်းရင် ငရုတ်သီးစိမ်းက စိမ်းစိမ်းလေး ဖြစ်မြဲဖြစ်နေပါတယ်။ ငရုတ်သီးစိမ်းထောင်းကြော်ကို ဘူးသီးချဉ်ရည်ဟင်း၊ ဗမာကြက်သားကြော် ပူပူလေး စတာတွေနဲ့ တွဲဖက် စားလို့ ကောင်းပါတယ်။
