ရာသီစာစားမှ ဖြစ်နေတဲ့ ရာသီဥတု ဒဏ်ကို ခံနိုင်တာ၊ အဖျားအနာ ကင်းတာဆိုတာကို ပါးစပ်က တတတွတ်တွတ် ပြောပြီး ရာသီနဲ့ အလိုက်ချက်ပြုတ် ကျွေးမွေး သင်သွန် ခဲ့တဲ့ မိဘနှစ်ပါးရဲ့ ကျေးဇူးကြောင့် အိမ်က ကလေးတွေကိုလည်း ရာသီစာတွေကို အမျိုးမျိုး အသွင်ပြောင်းပြီး ကျွေးပါတယ်။ အခုလည်း အငယ်ကောင်က မနက်စောစောစီးစီး ထမင်းနယ် စားခြင်တယ်ဆိုလို့ အိမ်ကနုတဲ့ မကျည်းကိုင်းကို ချိုင်ပြီး မကျည်းရွက်နုတွေကို ခြွေပြီး မနေ့က ချက်ထားတဲ့ ဟိုနဲနဲ ဒီနဲနဲကျန်တာတွေကို ကျန်စုရှင်း လုပ်ပြစ်လိုက်ပါတယ်။ အိမ်ကလူတွေကတော့ ကျန်စုရှင်းဆို လုစားကြတယ်။ လုပ်စား ကြည့်လိုက်ပါအုံး။
ပါဝင်ပစ္စည်းများ
- ထမင်း ၂ လုံး (ဟင်းချို ပန်းကန်လုံး အသေး)
- မကျည်းထောင်းစပ်စပ် ၂ ဇွန်း (ထမင်းစားဇွန်း)
- မကျည်းရွက် လက်တဆုပ်စာ
- ကြက်ဥမွှေကြော် (ခရမ်းချဉ်သီး ၊ ကြက်သွန်နီ ၊ နံနံပင်)
- မျှစ်ပြုတ်
- ဖရဲသီး ပေါက်စပြုတ်
- မြေပဲဆီစစ်စစ်
ပြုလုပ်နည်း
- ဇလုံ တခုထဲတွင် ထမင်း၊ မကျည်းထောင်းစပ်စပ်၊ မကျည်းရွက်စိမ်း တို့ကို မြေပဲဆီ စစ်စစ်နှင့် နှံ့အောင်နယ်ပါ။ ဆား၊ ငံပြာရည် လုံးဝ မထည့်ရပါ။ မကျည်းထောင်းစပ်စပ်ထဲတွင် ဆားပါပြီးသား ဖြစ်ပါသည်။
- ကြက်ဥမွှေကြော် ထဲတွင် ခရမ်းချဉ်သီး၊ ကြက်သွန်နီ၊ နံနံပင်တို့ ပါဝင်ပသည်။
- မျှစ် နဲ့ ဖရဲသီးပေါက်စတွေကို တို့စားရန် ပြုတ်ထားပါသည်။
- မကျည်းထောင်းစပ် နှင့် နယ်ထားသည့် ထမင်းကို ကြက်ဥမွှေကြော် ၊ မျှစ်ပြုတ်၊ ဖရဲသီးပေါက်စပြုတ်၊ မြေပဲကြော် တို့နှင့် တွဲစားပါသည်။
MyFood Myanmar