ပါဝင်ပစ္စည်းများ

  • ငါးနီတူငါးခြောက်
  • မြေပဲ
  • ကြက်သွန်နီ
  • ကြက်သွန်ဖြူ
  • ငရုပ်သီးအနီခြောက်
  • ငရုပ်သီးအနီအရှည်
  • ပုဇွန်ငါးပိ(သို့) ပုဇွန်ခြောက်မှုန့်
  • ဆား
  • သကြား
  • ဆီ

ပြုလုပ်နည်း

ပထမဆုံး ငါးနီတူ၊ ငါးခြောက်လေးများကို ရေစင်အောင် ဆေးပြီး ဇကာဖြင့် ရေစစ်ထားပါ။ ကြက်သွန်အနီ၊ ကြက်သွန်ဖြူ ၊ငရုပ်သီး အနီ ခြောက်၊ ငရုပ်သီးအနီအရှည်(ပုံဖြင့်ဖော်ပြထားပါသည်) တို့ကိုရောပြီး ကြိတ်စက်ဖြင့် ကြိတ်(သို့) ငရုပ်ဆုံဖြင့် ထောင်းထားပါ။

ဒယ်အိုးထဲသို့ ဆီခပ် များများထည့်ပြီး မြေပဲဆံများကို အရင်ကြော်ပါ။ ထို့နောက် ပန်းကန်ပြား တစ်ခု ထဲထည့်ပြီး အအေးခံထားပါ။မြေပဲဆံကြော်ထားသည့် ဆီထဲသို့ ရေစစ်ထားသည့် ငါးနီတူ ငါးခြောက်လေးများ ထည့်ပြီး မီးအေးအေးဖြင့် ကြော်ပါ။

အနည်းငယ် ကြွပ်လာပါက ဒယ်အိုးကို တစ်ဖက်သို့ စောင်းပြီး မီးပိတ် ဆီစစ်ထားကာ ၂-မိနစ်ခန့်အအေးခံထားကာ ဒုတိယ အကြိမ် ငါးခြောက်များ ကြွပ်ရွလာသည်ထိ ကြော်ပြီး ဇကာဖြင့် ဆီစစ်ထားပါ (ငါးခြောက်များ ပိုမိုကြွပ်ရွ စေရန်အတွက် ၂ ကြိမ်ကြော်ပေးရပါသည်။)

ငါးခြောက် ကြော်ထားသည့် ဆီထဲသို့ အသင့် ထောင်းထားသည့် ငရုပ်အနှစ်ထည့်ပြီး မွှေးလာသည်ထိ ဆီသတ်ပြီး ပုဇွန် ငါးပိ အနည်းငယ် ထည့်ပါ။

ပုဇွန်ငါးပိ မကြိုက် နှစ်သက်ပါက ပုဇွန်ခြောက် အမှုန့်ထည့်ပါ။ ထို့နောက် ငရုပ်သီး အနှစ်များကို ဆီစစ်ပြီး ပန်းကန်လုံး တစ်ခုထဲ ထည့်ထားပါ။ မီးဖိုကို မီးပိတ်ထားပြီး ဒယ်အိုးထဲသို့ ဆားနှင့် သကြား အနည်းငယ် ဆီထည့်ပြီး အသင့်ကြော် ထားသည့်မြေပဲစံထည့်ပြီးရောမွှေပါ။

အသင့်ကြော်ထားသည့် ငါးနီတူခြောက် ပါရောထည့်ပြီး မွှေကာ မီးကို ခပ်အေးအေး ဖွင့်ထားပြီး ငရုပ်သီး အနှစ်သင့် တော်သလောက် ထည့်ပြီး ရောမွှေပေးကာ ကြွပ်ရွပြီး အနံ့မွှေးလာပါက မီးပိတ်ချ၍ အသင့် စားသုံးနိုင်ပါသည်။ (အအေးခံပြီး ပုလင်းထဲသို့ထည့်ထားပါက ကြာရှည်စွာစားသုံး၍ရပါသည်။)

Credit: ဇွဲသုသု