သီးစုံကော်ရည် ချက်တဲ့နေ့က ထမင်းမိန်စေတဲ့ နေ့လေးတနေ့ပါ။ အသားမပါပေမယ့် အချို၊ အချဉ်၊ အငံအရသာ ပိုထားပြီး အသီးအနှံ တို့ရဲ့ အဟာရ အရသာတို့က ပြည့်စုံနေတဲ့ အတွက် စားမိန်ဖွယ်ရာ ဟင်းတစ်မယ်ဆိုလဲ မမှားပါဘူး။ ထမင်းပေါင်း လုပ်စားချင်ရင်လဲ ထမင်းပူပူပေါ် ဆမ်းပြီး စားနိုင်တဲ့ ချိုချဉ်ဟင်းမို့ ချက်နည်းလေး မျှဝေချင်ပါတယ်။
ပါဝင်ပစ္စည်းများ
- ခပ်ထူထူလှီးထားသော ဂေါ်ဖီ – ဟင်းပြင်ပန်းကန်အသေး တလုံးစာ
- အနေတော်လှီးထားသော ဘရိုကိုလီ – ဟင်းပြင်ပန်းကန်အသေး တလုံးစာ
- ကြက်သွန်နီ – တလုံး (လှီးထားပါ)
- မုံလာဥနီ – ဟင်းပြင်ပန်းကန်အသေး တလုံးစာ (သေးသေးရှည်ရှည် လှီးထားပါ)
- ကြက်သွန်ဖြူ – ၃ မွှာ (ဓါးပြားရိုက်ထားသော)
- ချယ်ရီခရမ်းချဉ်သီး – ၈ လုံး
- တရုတ်နံနံ – ၂ ခက် (အခက်ကြီးကြီး)
- ပြောင်းကော်မှုန့် – ၂ ဇွန်းမောက်မောက် ( ထမင်းစားဇွန်း )
- သကြား – တစ်ဇွန်း (ထမင်းစားဇွန်း)
- ဆား – တစ်ဇွန်း (လက်ဖက်ရည်ဇွန်း)
- ပဲငံပြာရည် – တစ်ဇွန်း (ထမင်းစားဇွန်း )
- ဆီ – ၃ ဇွန်း (ထမင်းစားဇွန်း)
ပြင်ဆင်ပြုလုပ်နည်း
- ဇောက်နက်သော အိုးတလုံးကို အပူပေးပြီး ဆီထည့်ပါ ။
- ဆီပူလာပါက ဓါးပြား ရိုက်ထားသော ကြက်သွန်ဖြူကို မွှေးလာတဲ့ အထိ ကြော်ပေးပါ ။
- ကြက်သွန်ဖြူ မွှေးလာတာနဲ့ တရုတ်နံနံနှင့် ခရမ်းချဉ်သီးမှ လွဲပြီး အားလုံးကို ထည့်ကြော်ပေးပါ ။
- ၂ မိနစ်လောက်ဘဲ ကြော်ပေးပါ ။ အရွက်များ နွမ်းလျှင် စားလို့ မကောင်းပါ ။
- အရွက်များ အရမ်း မနွမ်းခင်မှာ ဖျော်ထားသော ကော်ရည်ကို လောင်းထည့်ပြီး မွှေပေးပါ ။
- ကော်ရည်ပျစ် လာပါက ခရမ်းချဉ်သီးနှင့် တရုတ်နံနံ ထည့်မွှေပြီးတာနဲ့ မီးပိတ်ပေးပါ ။
- ထမင်းပူပူနဲ့ တွဲဖက် စားသုံးနိုင်ပါပြီ ။
ကော်ရည်ဖျော်ထားရန် (အသီးအရွက် မကြော်ခင် ကော်ရည် ဖျော်ထားပါ ။)
- ပြောင်းကော်မှုန့်
- သကြား
- ဆားတို့ကို ရေ တရုတ်ဟင်းရေသောက်ပန်းကန် တစ်လုံးစာလောက်နဲ့ ဖျော်ထားပေးပါ ။
Credit: Mar Mar Lwin
