ကျွန်တော့်အစ်မ တစ်ယောက်တောင်းဆိုထားလို့ Korean BBQ-Pork (Dwaejibulgogi) ပြုလုပ်နည်းလေး ဖော်ပြပေးလိုက်ပါတယ်။
ပါဝင်ပစ္စည်းများ
- ဝက်သား – ၄၅၀ ဂရမ်
- ပန်းသစ်တော်သီး – ၁ ခြမ်း (အလုံးသေး)
- ကြက်သွန်ဖြူ – ၄ မွှာ
- ကြက်သွန်နီ – ၁ လုံး (အနေတော်)
- ဂျင်း – ဇွန်းဝက် (လဖက်ရည်ဇွန်း)
- ပဲငံပြာရည်အကြဲ – ၁ ဇွန်း (စားပွဲတင်ဇွန်း)
- သကြား – ၁ ဇွန်း (စားပွဲတင်ဇွန်း)
- သကြားရည် Syrup – ၂ ဇွန်း (စားပွဲတင်ဇွန်း)
- နှမ်းဆီ – ၂ ဇွန်း (စားပွဲတင်ဇွန်း)
- ငရုပ်ကောင်းမှုန့် – အနည်းငယ်
- ငရုပ်သီးမှုန့် – ၁ ဇွန်း (စားပွဲတင်ဇွန်း)
- ကိုရီးယားငရုပ်အနှစ် – ၂ ဇွန်း (စားပွဲတင်ဇွန်း)
- ဝိုင်ဖြူ White Wine – ၂ ဇွန်း (စားပွဲတင်ဇွန်း)
ပြုလုပ်နည်း
- ဝက်သားက (Sirloin) သားရရင် ကောင်းပါတယ် ။ ခပ်ပါးပါးလှီးပြီး ဇလုံတစ်ခုထဲ ထည့်ထားပါ ။ ပါဝင်ပစ္စည်းများဖြစ်သည့် ပန်းသစ်တော်သီး ၊ ဂျင်း ၊ ကြက်သွန်နီ ၊ ကြက်သွန်ဖြူ တို့ကို ကြိတ်စက် (Blender) ထဲထည့်မွှေ့ ပါ ။
- ပန်းကန်လုံး တစ်ခုထဲသို့ လောင်းထည့်ပြီး အခြားပါဝင်ပစ္စည်းများကို ဖော်ပြထားသည့် အချိုးအစားအတိုင်း ထည့်၍နှံ့အောင်ရောမွှေပေးပါ ။
- ထို့နောက် လှီးထားသည့် ဝက်သားများထည့်ပြီး သမအောင် ရောနှယ်၍ ရေခဲသေတ္တာထဲတွင် အနည်းဆုံး ၂ နာရီ မှ ၄ နာရီ ကြားနှပ် ထားပြီး ပုံတွင်ပြထားသည့် BBQ Plate ပေါ်တွင်တင်ပြီး (ကင်ပြီး) အရသာရှိစွာ စားသုံးနိုင်ပါသည် ။
- ကင်ထားသည့် ဝက်သားကို ဆလက်ရွက် ဖြင့်ထုပ်၍ ဆော့အနည်းငယ် မျှထည့်ကာစားသုံးရပါသည် ။ စားပွဲပေါ်တွင်ချပေးထားသည့် ကြက်သွန်ဖြူ ၊ ငရုပ်သီးစိမ်းများကိုလည်း ကြိုက်နှစ်သက်ပါက ထည့်ပြီးစားသုံးနိုင်ပါသည် ။
ဆော့စ် ပြုလုပ်ပုံ
- ကိုရီးယား ပဲ အနှစ် – ၃ ဆ
- ကိုရီးယား ချီလီ အနှစ် – ၁ ဆ
- Corn-Syrup (မရှိရင်) ပျားရည် – ၁ ဆ
- သကြား – အနည်းငယ်
- ကြက်သွန်နီ ၊ ကြက်သွန်ဖြူ ၊ ငရုပ်သီးစိမ်းအနည်းငယ်ခန့်တို့ကို ရောကြိတ်ပြီးမွှေပေးပါက ဆော့စ်ရပါပြီ ။ကျေးဇူးတင်ပါသည်။Credit: ဇွဲသုသု