ငရုတ်သီးစိမ်းနှင့် ရှောက်သီး သိပ်ကို အတွဲမိပါတယ်။ နှစ်ခုပေါင်း ကြော်လိုက်တော့ ချဉ်စပ်စပ် အရသာလေးဖြင့် ဆွဲဆောင်မှုတွေက ကြားရုံနှင့် သွားရည် ကျစေပါတယ်။ နလန်ထ ထမင်းစား ပျက်နေသူတွေ အတွက်လည်း ထမင်းမြိန်စေသော ဟင်းလေး တစ်ခွက်ပါ။ ထမင်းမြိန်စေတာ တကယ်ပါ။ ထမင်းကို နှစ်ပန်းကန် မစားတဲ့ စည်တောင် ထမင်းနှစ်ပန်းကန် ကုန်ပါတယ်။ ချက်ဖြစ်အောင် ချက်စားကြည့်နော် . . . ။
ပါဝင်ပစ္စည်းများ
- ရှမ်းငရုတ်သီးစိမ်း – ၃ဝ ကျပ်သား (အနေတော်လေးတွေ ညှပ်ထားပါ)
- ပုစွန်ခြောက်မှုန့် – စားပွဲဇွန်း ၅ ဇွန်း
- ဆား – လက်ဖက်ရည်ဇွန်း ၁ ဇွန်း
- မျှင်ငါးပိစိမ်း – လက်ဖက်ရည်ဇွန်း ၁ ဇွန်း
- အသီးအရွက်ဆီ – စားပွဲဇွန်း ၇ ဇွန်း
- ငံပြာရည် – လက်ဖက်ရည်ဇွန်း ၁ ဇွန်း
- ကက်သွန်နီ – ၃ လုံး (ထောင်းထားပါ)
- ကြက်သွန်ဖြူ – ၄ တက် (ထောင်းထားပါ)
- အရောင်တင်မှုန့် – လက်ဖက်ရည်ဇွန်း ၁ ဇွန်း ခွဲ
- နနွင်းမှုန့် – လက်ဖက်ရည်ဇွန်း တစ်ဝက်
- ရှောက်သီး – ၁ လုံး (အသားများနွှာထားပါ)
ပြုလုပ်နည်း
- မကပ်သော အကြော်အိုးထဲသို့ ဆီထည့်ပါ။ ဆီပူလာလျှင် နနွန်းမှုန့်နှင့် ကြက်သွန်ဖြူ၊ နီ ထည့်တည်ပါ။
- မွှေးပြီး အရောင်လှလာလျှင် ငါးပိ၊ အရောင်တင်မှုန့်နှင့် ငံပြာရည်ထည့်ပါ။ သိသိသာသာ မွှေးပြီး လာပါလိမ့်မယ်။ ငရုတ်သီးစိမ်းများ ထည့်ပြီး နွမ်းလာသည်အထိကြော်ပါ။
- ပုစွန်ခြောက်မှုန့်ကို ထည့်လို့ရပါပြီ။ ပြီးလျှင် နွှာထားသော ရှောက်သီးအသားများကိုထည့်ပြီး ဖြည်းဖြည်းနဲ့ ဖွဖွလေးမွှေပေးပါ။ ဆား ထည့်ပြီး ခပ်ဖွဖွနှံ့အောင်မွှေပါ။
- ငရုတ်သီးနွမ်းလာလျှင် ဆားမြည်ပါ။ လိုတာကိုထပ်ဖြည့်ပြီး ထမင်းပူပူ ဆူးပုတ် ပဲထောပတ် ဟင်းချိုတို့ဖြင့် တွဲစားမယ်ဆိုလျှင် အင်မတန်လိုက်ဖက်ပါတယ်။
မှတ်ချက် – သက်သတ်လွတ်ကြော်ချင်လျှင် ဆား၊ မြေပဲဆန်တို့ဖြင့် ကြော်ရင်ရပါတယ်။
